‘मी काँग्रेसमध्ये जाण्याचा प्रश्‍नच नाही. यासंबंधीच्या अफवा असून ते माझ्या बदनामीचे षडयंत्र आहे. आमच्यातील वाद आता मिटला असून आम्ही एकत्र आलो आहोत. ज्या तक्रारी झाल्या, त्याबद्दल पक्ष जो निर्णय घेईल, तो आम्हा सर्वांना मान्य राहील, असे मुंबईतील बैठकीतच मान्य करण्यात आलेले आहे, अशी माहिती भाजपचे ज्येष्ठ नेते आमदार राधाकृष्ण विखे पाटील यांनी दिली. विखे यांनी या गोष्टीवर पडदा पडला असे सांगीतले असल्याने भविष्यात भाजपमध्ये याचा काय परिणाम होणार हे आता पाहणे गरजेचे आहे.
जिल्हा परिषदेच्या अध्यक्ष-उपाध्यक्षपदाच्या निवडणुकीसंबंधी भाजपच्या कोअर समितीची बैठक शनिवारी नगरला झाली. त्यानंतर पत्रकारांशी बोलताना विखे यांनी ही माहिती दिली. माजी मंत्री राम शिंदे, माजी आमदार शिवाजी कर्डिले, भाजपचे जिल्हाध्यक्ष भानुदास बेरड यावेळी उपस्थित होते.
मुंबईत शुक्रवारी झालेल्या बैठकीबद्दल विचारले असता विखे म्हणाले, ज्यांना जे बोलायाचे होते, सांगायचे होते, ते पक्षश्रेष्ठींकडे सांगितले आहे. आता त्यावर पुढील अहवाल आणि कारवाई वगैर प्रक्रिय होणार आहे. तो निर्णय सर्वांनी मान्य केलेला आहे. त्यामुळे आता कोणताही वाद राहिलेला नसून आम्ही सर्वजण एकत्र आलो आहोत. याच पद्धतीने जिल्हा परिषदेच्या निवडणुकीला सामोरे जाणार आहोत. यासंबंधीचा निर्णय शनिवारी झालेल्या बैठकीत घेण्यात आला आहे. जिल्हा परिषदेत आम्ही काय करणार, कोण उमेदवार असणार, कसा विजय मिळणार हे 31 डिसेंबरलाच स्पष्ट होईल. यासंबंधी राष्ट्रवादीचे नेते अकुंश काकडे यांनी येथे येऊन काही दावे करण्यापेक्षा आपल्या पुणे जिल्ह्यात लक्ष घालावे. पुण्याची महापालिका सांभाळावी. ज्यांना ग्रामपंचायत जिंकता येत येत नाही, अशा राष्ट्रवादीच्या जिल्हाध्यक्षांनीही आम्हाला आव्हान देऊ नये. अपघाताने महाविकास आघाडीचे सरकार आले आहे, त्याच्या जोरावर काही लोकांना हुडहुडी आली आहे, असा टोलाही विखे यांनी लगावला.
आपण काँग्रेसमध्ये जाणार या केवळ अफवा आहेत. आपल्या बदनामीचे ते षडयंत्र आहे. आपण भाजपमध्येच समाधानी असून इतरत्र कोठे जाण्याचा प्रश्‍नच नाही, असेही विखे यांनी स्पष्ट केले. शिंदे यांनी सांगितले की, ज्यांना काही तक्रारी करायच्या होत्या, म्हणणे मांडायचे होते, ते पक्षाच्या बैठकीत मांडले आहे. तेथे झालेल्या निर्णयावर सर्वांचे समाधान झाले आहे. त्यामुळे पुन्हा हा मुद्दा उपस्थित करण्याची गरज नाही. आम्ही एकत्रितच आहोत. एकत्रच काम करणार आहोत. कर्डिले आणि बेरड यांनीही याला दुजोरा दिला.
