गोवा महामार्गावरील परशुराम घाटातील चौपदरीकरणाचे सुरू असले तरी पावसाळा तोंडावर असताना हे काम किती पूर्ण होईल याबाबत प्रश्नचिन्ह कायम आहे. चिपळूण हद्दीतील इगल कंपनीमार्फत एक लेनचे काम मार्गी लागले आहे, परंतु खेड हद्दीतील कल्याण टोलवेज कंपनीमार्फत सुरू असलेल्या कामाला अजूनही अपेक्षित वेग नाही. या भागात दोन्ही लेनचे काम बाकी आहे. 31 मेअखेर संपूर्ण परशुराम घाटातील काँक्रीटीकरणाची एक लेन सुरू करण्याचा प्रयत्न राष्ट्रीय महामार्ग विभागाकडून केला जात आहे, मात्र कल्याण टोलकडील काम पूर्ण होते की नाही यावर त्याचे भवितव्य अवलंबून राहणार आहे.
गोवा राष्ट्रीय महामार्गावरील चौपदरीकरणाच्या कामात परशुराम घाट सुरुवातीपासून अडचणीचा बनला आहे. एकीकडे 23 मीटर उंचीची दरड व दुसरीकडे दरीचा धोका असल्याने या कामात प्रत्येक टप्प्यावर अडचणी येत गेल्या. तब्बल 2 वर्षे सुरू असलेल्या या कामाला 6 महिन्यांपूर्वी काहीसा वेग आला. पहिल्या टप्प्यात दरीच्या बाजूने 900 मीटर संरक्षक भिंत बांधण्यात आली. त्यानंतर दरडीच्या बाजूने खोदाई करण्यात आली. अतिशय धोकादायक परिस्थितीत काम करताना दरडीखाली पोकलेन सापडून एका कर्मचाऱयाचा मृत्यू झाला होता. त्यानंतर सातत्याने चौपदरीकरणाचे काम सुरू असून चिपळूण हद्दीतील बहुतांशी काम अंतिम टप्प्यात आले आहे. या हद्दीत इगल कंपनीमार्फत एक लेनचे काम पूर्ण झाले आहे.
दरम्यान, आता पावसाळा काही दिवसांवर येऊन ठेपल्याने घाटातील किमान एक लेनचे काँक्रीटीकरण पूर्ण करण्यासाठी प्रयत्न केले जात आहेत, मात्र त्यामध्ये कल्याण टोलवेजचे काम अजूनही मागे पडल्यासारखेच आहे. ज्या पद्धतीने खेड हद्दीत यंत्रणा राबवायला हवी होती त्यानुसार यंत्रणा दिसून येत नाही. त्यामुळे परशुराम घाटातील काम आणखी काही दिवस लांबणीवर पडण्याची शक्यता आहे.
टोलवेज कंपनीचे काम संथ
खेड हद्दीतील कल्याण टोलवेज पंपनीच्या कामाला अजूनही गती आलेली नाही. या हद्दीत कठीण खडक तोडण्याचे काम अजूनही सुरू आहे. त्यासाठी दोन ब्रेकरने खडक तोडण्याचे काम सुरू असले तरी ते पूर्णत्वास गेलेले नाही. शिवाय दरडीच्या बाजूने संरक्षक भिंत उभारण्याचे काम बाकी आहे.
