बिहारच्या छपरा जिल्ह्यात एक धक्कादायक प्रकार घडला आहे. कोरोनाची लस घ्यायला आलेल्या एका व्यक्तीला रिकामं इंजेक्शन टोचण्यात आलं आहे. ज्या नर्सने हा प्रकार केला आहे तिचं नाव चंदा देवी असून तिला लस टोचण्याच्या कामावरून तात्पुरत्या स्वरुपात हटवण्यात आलं आहे. चंदा देवी हिच्याकडून या प्रकाराबाबत स्पष्टीकरण मागवण्यात आलं होतं, यावर तिने ही मानवी चूक असल्याचं म्हटलंय. ज्या नागरिकासोबत हा प्रकार घडला आहे, त्याला कोरोनाची लस पुन्हा दिली जाणार असल्याचं सांगण्यात आलं आहे.
Somewhere in #Bihar , Look at Bihari style , without vaccine giving injection, but friends were recording everything on mobile & when they came back to home , saw the truth @DrJwalaG @ShibuVarkey_dr @mangalpandeybjp @ArvinderSoin #FreeVaccine pic.twitter.com/IcCwFTXlMy
— The Warrior X (@optimusprime699) June 24, 2021
छपरा जिल्ह्यातील ब्रम्हपूर भागात कोरोना लसीकरण केंद्र सुरू करण्यात आलं आहे. या केंद्रावर हा नागरीक लस घ्यायला आला होता. व्हायरल व्हिडीओमध्ये नर्स चंदा देवी ही सिरींज पाकिटातून बाहेर काढते आणि लसीच्या कुपीतून लस न घेता रिकामं इंजेक्शनच या नागरिकाला टोचते असं स्पष्टपणे दिसतंय. वैद्यकीय अधिकारी डॉ.अजय कुमार यांनी चंदा देवी यांच्याकडे या घटनेनंतर स्पष्टीकरण मागितलं होतं. स्पष्टीकरण मिळाल्याच्या 48 तासांच्या आत पुढील कारवाई केली जाईल असं त्यांनी सांगितलं आहे.
ज्या नागरिकासोबत हा प्रकार घडला, त्याचं नाव अजहर हुसेन असं आहे. आपण लस घेतली हे जगाला कळावं म्हणून अजहरने सोशल मीडियावर व्हिडीओ शेअर केला. तो पाहिल्यानंतर लोकांनी त्याला सांगायला सुरुवात केली की तुला लस मिळालेलीच नाही. तुला लस दिली नसून नुसती हवा टोचलीय असं लोकांनी त्याच्या निदर्शनास आणून दिलं. या प्रतिक्रिया पाहिल्यानंतर अजहरला त्याला चंदा देवी हिने गंडवल्याचं कळालं. व्हिडीओ व्हायरल झाल्यानंतर चंदा देवी हिच्याविरोधात कारवाई करण्यात आली.
