दिल्ली डायरी : काँग्रेसमधील बोलभांड नेत्यांना आवरा

984

>> नीलेश कुलकर्णी,   [email protected]

‘आता गांधी नकोत’ असे म्हणत राहुल गांधी निर्धाराने काँग्रेस पक्षाच्या अध्यक्षपदाच्या जबाबदारीतून बाहेर पडले, मात्र काँग्रेसजनांनी अखेर ‘गांधी विरुद्ध गांधी’ हे राजकीय नाटय़ बेमालूमपणे वठवत सोनियाजींना त्या पदावर आणून बसवले. आता सोनियांनी अधीररंजन, पी. चिदंबरम, मणिशंकर अय्यर आणि दिग्विजय सिंग यांच्यासारख्या भाजपसाठी ‘संकटमोचक’ ठरणाऱ्या नेत्यांच्या तोंडाला लगाम घातला तरच काँग्रेसला भवितव्य असेल, अन्यथा त्या पक्षाचे भवितव्य कठीण आहे.

जम्मू-कश्मीरला विशेष राज्याचा दर्जा देणारे 370 वे कलम 

हद्दपार केल्यानंतर संपूर्ण देशात आनंदाला उधाण आले असले तरी काँग्रेसमध्ये ‘रुदाली’चा कार्यक्रम जोरदार सुरू आहे. हे कलम हटविण्याच्यावेळी संसदेत झालेल्या चर्चेत काँग्रेसचे गटनेते अधीररंजन चौधरी यांनी जम्मू-कश्मीरचा विषय ‘युनो’पर्यंत गेलेला असताना आपण परस्पर निर्णय कसा घेऊ शकतो, असा सवाल केला होता. आपण आणि आपला पक्ष फक्त ‘अधीर’ नाही तर ‘बधिर’ही झाला असल्याचेच त्यांनी दाखवून दिले होते. अधीर यांच्या विधानामुळे काँग्रेस नेत्या सोनिया गांधी संतप्त झाल्या खऱया, मात्र ‘जो बूंद से गयी वो हौद से नहीं आती.’ देशातील सर्वात जुना पक्ष असलेल्या काँग्रेसला त्यांच्याच ‘बोलभांड’ नेत्यांनी शत्रूराष्ट्र असलेल्या पाकिस्तानच्या पंक्तीत नेऊन बसवले आहे. अगोदरच घटनेच्या 370 व्या कलमाचा घोळ 70 वर्षे तसाच कायम ठेवल्याबद्दल जनमानसांत काँग्रेसबद्दल रोष आहे. त्यातच मोदी सरकारने हे कलम हद्दपार केल्यानंतरही काँग्रेसी नेत्यांची या कलमासाठी वकिली सुरूच आहे. त्यासाठी त्यांचा बोलभांडपणा सुरू आहे. स्वातंत्र्यपूर्व काळातील काँग्रेस ही जनभावनेची प्रतीक होती. मात्र हल्लीच्या काँग्रेसची अवस्था उलटय़ा गंगेसारखी झाली आहे. जनभावना आणि देशभावनेविरोधात भूमिका घेतल्यामुळे जनतेने हातात दंडुका घेऊन सत्तेतून बेदखल केल्यानंतरही काँग्रेसला उपरती येताना दिसत नाही. यातच काँग्रेसच्या अपयशाचे गमक दडलेले आहे. 2014 च्या दारुण पराभवाची मीमांसा करण्यासाठी नेमलेल्या ए. के. ऍण्टोनी समितीने दिलेला अहवाल अजूनही गांभीर्याने घ्यावा असे काँग्रेस नेतृत्वाला वाटत नाही. ‘गेल्या दहा वर्षांच्या काळात हे सरकार आपले आहे असे सर्वसामान्य हिंदूंना कधीच वाटले नाही. बहुसंख्याक हिंदू उपेक्षित असल्याची भावना प्रबळ झाल्याने हा पराभव झाला’ असे निरीक्षण या अहवालात होते, मात्र पराभवाबरोबरच हा अहवाल गुंडाळून ठेवण्यात आला आणि मुस्लिम लांगूलचालनाच्या दाढय़ा कुरवाळण्यातच काँग्रेसी नेत्यांनी धन्यता मानली. 370 कलमाचा विषय हा जातीधर्मापेक्षा देशहिताचा आहे. तरीही त्यात काँग्रेसने ‘धर्मा’ची शोधाशोध केली. जम्मू-कश्मीरच्या सरकारने ‘फिलिस्तीन’ केल्याची टीका मणिशंकर अय्यर यांनी केली आहे तर जम्मू-कश्मीर हिंदूबहुल असता तर 370 हे कलम रद्द केले गेले नसते असे अकलेचे तारे विद्वान म्हणविणाऱया पी. चिदंबरम यांनी तोडले आहे. दिग्विजय सिंग हे आणखी एक भाजपचे ‘संकटमोचक’ ते अजून बरळलेले नाहीत हे काँग्रेसचे नशीब! राजकारणात विरोधकांनी मुद्दय़ांवर आधारित विरोध हा करायचाच असतो. मात्र देशहित हे सत्ताधारी व विरोधक हे दोघांचेही एकसमान उद्दिष्ट असायला हवे. मात्र व्होट बँकेच्या मोहापायी काँग्रेसला देशहितही दिसेनासे झाले आहे. त्यामुळे काँग्रेसविरोधकांची भाषा न बोलता पाकिस्तानची भाषा बोलत आहे अशी प्रतिमा जनमानसांत निर्माण होत आहे. काँग्रेसच्या अध्यक्षपदाची धुरा घेऊन सोनियांनी मृतवत पडलेल्या काँग्रेसमध्ये जान आणली होती हा इतिहास आहे. आता बोलभांड नेत्यांच्या तोंडाला कुलूप घालून सोनियांनी काँग्रेसला सावरायला हवे.

हिंदी विरुद्ध इंग्रजी…

आपल्या देशात कशावरून वाद पेटेल त्याचा भरवसा नाही. त्यातच हिंदी ही काही राष्ट्रभाषा नाही असा अनेकांचा आक्षेप आहे. सभापती व्यंकय्या नायडू हे तर प्रादेशिक भाषांचे पुरस्कर्ते आहेत. त्यामुळे बिनधास्तपणे आपल्या मातृभाषेत बोला असा व्यंकय्यांचा सांगावा असल्याने राज्यसभेत अनेक खासदार मातृभाषेत बोलताना दिसून येतात. स्वतः दाक्षिणात्य असूनही व्यंकय्या ‘राष्ट्रीय ऐक्या’चे प्रतीक म्हणून इंग्रजीसोबतच हिंदीतही आवर्जून बोलतात. मात्र मेडिकल कमिशन बिलावर केंद्रीय आरोग्यमंत्री डॉ. हर्ष वर्धन हिंदीतून बोलत असल्याचे पाहून एमडीएमकेचे वादग्रस्त नेते वायको यांनी त्याला आक्षेप घेतला. हे विधेयक राष्ट्रीय हिताचे आहे म्हणून सर्वांना समजेल अशा इंग्रजीत मंत्र्यांनी बोलावे असा आग्रह धरत वायकोंनी गोंधळ घातला. सभापतींनी अनुवादक असल्याने तुम्हाला इंग्रजीत ऐकायला मिळेल असे सांगूनही वायकोंचा धुडगूस काही संपत नव्हता. त्यांच्यापुढे हर्ष वर्धनही हतबल दिसले. मात्र शेजारीच बसलेल्या गृहमंत्री अमित शहा यांच्याकडे हर्ष वर्धन यांनी पाहिले. अमितभाईंनी ‘हिंदी में’ असे पुटपुटताच मग काय वायकोंचा विरोध फाटय़ावर मारत हर्ष वर्धन यांनी संपूर्ण विधेयक हिंदीतून मांडले. तिकडे वायकोंचा थयथयाट सुरूच राहिला. या विधेयकापुरती हिंदीची सरशी झाली खरी, मात्र संसदेत भाषेवरून होणारी लठालठ्ठी शोभादायक नाही हेच खरे.

रात्रीस खेळ चाले!

संसदेच्या यावेळच्या अधिवेशनात अनेक राजकीय गमतीजमती घडल्या. गृहमंत्री अमित शहा यांच्या डावपेचापुढे काँग्रेसची तर दाणादाण उडाली. राज्यसभेत 370 वे कलम रद्द करणारे विधेयक आले तर ते मंजूर होणार कसे, राज्यसभेत बहुमत नाही, असे अनेक प्रश्न सरकारपुढे होते. मात्र फोडा आणि झोडा रणनीती वापरत शहा यांनी विरोधकांचे संख्याबळ घटवले. बसपा, आपसारख्या पक्षांना सरकारच्या बाजूने मतदानापुरते खेचले. अनेकजण अनुपस्थित राहतील याचे ‘जुगाड’ जमवले, मात्र मास्टर स्ट्रोक ठरला तो काँग्रेसचे राज्यसभेतले मुख्य प्रतोद भुवनेश्वर कलिता यांच्या राजीनाम्याचा. गमतीचा भाग म्हणजे विधेयक मांडले जाण्यापूर्वीच्या आदल्या रात्री याच कलितामहाशयांनी हायकमांडशी चर्चा करून आपण सभागृहात स्थगन प्रस्ताव आणून सरकारची कोंडी करणार आहोत, अशी माहिती फोनवरून दिली होती. मात्र तो फोन खाली ठेवताच दिल्लीतील पॉलिटिकल गेमचा ‘रात्रीस खेळ चाले’ सुरू झाला. रातोरात कलिता यांचे ‘हृदयपरिवर्तन’ करण्यात आले. दहा वर्षे आसामचे प्रदेशाध्यक्ष राहिलेल्या कलितांना ‘गळा’ला लावण्यास भल्यापहाटे भाजप नेत्यांना यश मिळाले. त्यानंतर सकाळी राज्यसभेचे कामकाज सुरू होताच ज्यांच्यावर पक्षाचे सर्व सदस्य उपस्थित आहेत की नाही हे पाहण्याची जबाबदारी असते ते मुख्य प्रतोद असणारे कलितामहाशयच दिसत नव्हते. ते आता येतील, मग येतील अशी मनाची समजूत गुलामनबींसह काँग्रेसजन घालत असतानाच कलिता यांच्याऐवजी आला तो त्यांचा राजीनामा! सभापती व्यंकय्या नायडू यांनी समाजवादी पार्टीचे संजय सेठ, सुरेंद्रसिंग नागर यांच्यासह काँग्रेसच्या भुवनेश्वर कलिता यांनी दिलेला राज्यसभा सदस्यत्वाचा राजीनामा मंजूर केला आहे, अशी घोषणा करताच विरोधी पक्षनेते गुलामनबी आझाद, जयराम रमेश, मोतीलाल व्होरा यांचे चेहऱयावरचे रंगच उडून गेले. इतकेच नाही तर प्रेस गॅलरीतही पत्रकारांमध्ये अचंबा आणि आश्चर्याचे भाव उमटले. निष्ठावंत काँग्रेसी असलेले कलिता भाजपच्या गळाला कसे लागले? याचे रोचक रंजक किस्से नंतर ऐकायला मिळाले. कलितांनी आता भाजपचे कमळ हाती घेतले आहे. कलितांच्या ‘रात्रीस खेळ चाले’ या पक्षांतरनाटय़ास एखादे बक्षीसच द्यायला हवे.

आपली प्रतिक्रिया द्या