शहा सेनेचे बुलढाण्याचे आमदार संजय गायकवाड यांची मुजोरी आज महाराष्ट्राने पाहिली. गायकवाड यांनी लुंगी–बनियनवर आमदार निवासाच्या कॅण्टीनमध्ये राडा केला. शिळे जेवण दिल्याची तक्रार करत त्यांनी कॅण्टीन कर्मचाऱ्याला अमानुषपणे मारहाण केली. दरम्यान, या घटनेची तीव्र पडसाद आज विधिमंडळात उमटले. गुंडगिरी करणाऱ्या मुजोर आमदाराला निलंबित करा, अशी जोरदार मागणी विरोधकांनी सभागृहात केली. रात्री उशिरा एफडीएने कॅण्टीनचा परवाना रद्द केला.
मुंबई येथील आकाशवाणी आमदार निवासाच्या कॅण्टीनमध्ये मंगळवारी रात्री हा प्रकार घडला. संजय गायकवाड यांनी जेवणाची ऑर्डर दिली होती. त्यांना ऑर्डरप्रमाणे त्यांच्या खोलीत जेवणही पाङ्गवण्यात आले. मात्र जेवणातील डाळ आणि भात शिळा होता आणि त्याला वास येत होता, अशी तक्रार करत गायकवाड लुंगी बनियनवरच थेट कॅण्टीनमध्ये जात धिंगाणा घातला. या घटनेचे व्हिडीओ सोशल मीडियावर व्हायरल झाल्यानंतर गायकवाड यांच्या गुंडगिरीचा सर्वत्र निषेध होत आहे.
या मुजोर आमदाराची मस्ती याच अधिवेशनात उतरवा
अशा मस्तीखोर, मुजोर आमदाराची मस्ती याच अधिवेशनात उतरवणे गरजेचे आहे. गायकवाड यांनी ज्याप्रकारे बुक्केबाजी करत मारहाण केली आहे, भ्रष्टनाथ मिंधे यावर काही बोलणार आहेत का? ते शांत राहणार आहेत का? असे सवाल शिवसेना नेते आदित्य ङ्खाकरे यांनी केले.
गुंडागर्दी करणाऱ्या गायकवाड यांच्यावर कारवाई करा
महापुरुषांचा अवमान करणे, शिवीगाळ करणे, धमकी देणे असे प्रताप गायकवाड नेहमीच करत असतात. अशा गुंड प्रवृत्तीच्या आमदाराला पक्ष तरी कसा पाठीशी घालतो, असे काँग्रेस प्रदेशाध्यक्ष हर्षवर्धन सपकाळ म्हणाले.
अध्यक्षांनी दखल घेऊन योग्य कारवाई करावी
निकृष्ट दर्जाचे जेवण मिळाले तर तक्रार करता येते, परंतु अशी मारहाण योग्य नाही. सभापती व विधानसभा अध्यक्षांनी याची दखल घेऊन योग्य कारवाई करावी, अशी शिफारस मुख्यमंत्री देवेंद्र फडणवीस यांनी सभापती राम शिंदे यांच्याकडे केली.
आमदार गायकवाडांना बडतर्फ करा
निकृष्ट दर्जाचे जेवण दिले म्हणून हा आमदार दादागिरी करत आहे. सुसंस्कृत महाराष्ट्राला हे शोभत नाही. यांचा बंदोबस्त करा, त्यांना निलंबित करा, बडतर्फ करा अशी मागणी आमदार परब यांनी केली. आमदारांनी कसे राहावे याचे काही संकेत आहेत की नाही? हे गल्लीतील लोक आहेत का? सरकारच्या प्रतिमेला यामुळे बट्टा लागतो आहे. अशा लोकांचा तुम्ही पाठिंबा घेणार का? अशा लोकांच्या पाठिंब्यावर सरकार चालवणार का? असा प्रश्नांचा भडिमार त्यांनी केला. आमदार निवास विधिमंडळाच्या कार्यकक्षेत येते. विधिमंडळात मी कुणाला मारहाण केली तर तुम्ही निलंबित कराल. त्यामुळे या आमदाराचे निलंबन करून असे प्रकार खपवून घेणार नाही असे संदेश जनतेला द्या, अशी मागणी त्यांनी मुख्यमंत्री देवेंद्र फडणवीसांकडे केली.
