ऑक्टोबर-नोव्हेंबरमध्ये बिहार विधानसभा निवडणुका होण्याची शक्यता असून त्यादृष्टीने जोरदार तयारी सुरू झाली आहे. अशातच एनडीएत पहिली बंडखोरी झाल्याचे समोर आले आहे. सर्वांना सोबत घेऊन जाण्याची भाजपची तारेवरची कसरत सुरू असतानाच एनडीएतील एक मित्रपक्ष लोक जनशक्ती पार्टीचे अध्यक्ष चिराग पासवान यांनी आज स्वबळावर लढण्याची मोठी घोषणा केली.
विधानसभा निवडणुकीत आपला पक्ष सर्वच्या सर्व 243 जागा लढणार असल्याचे चिराग पासवान यांनी जाहीर केले आहे. भोजपूरमध्ये एका सभेत त्यांनी ही घोषणा केली. बिहारला बिहारी फर्स्ट बनवण्यासाठी लढणार आहे. आपला पक्ष बिहारसाठी नाही तर बिहारींसाठी मैदानात उतरणार आहे, असेही त्यांनी म्हटले आहे. गेल्या निवडणुकीतही पासवान यांनी मोदींचे हनुमान असल्याचे सांगत स्वतंत्र निवडणूक लढवली होती.
