पहाटेच्या सुमारास लोक साखरझोपेत असताना अचानक गावामध्ये बंदुकधारी घुसले. गावकऱ्यांना बंदुकीचा धाक दाखवून त्यांना घराबाहेर काढण्यात आले. त्यानंतर रांगेत उभे करून अंदाधुंद गोळीबार करण्यात आला. एवढेच नाही तर जे लोक घरात लपले होते त्यांना ज्वलनशील पदार्थ टाकून जिवंत जाळण्यात आले. यात 100 हून अधिक नागरिकांचा मृत्यू झाला असून शेकडो जखमी झाले आहेत. क्रूरतेचा कळस गाठणारा हा भयंकर प्रकार नायजेरियातील येलेवाटा गावामध्ये घडला आहे.
अ‍ॅमनेस्टी इंडरनॅशनल नायजेरियाने दिलेल्या माहितीनुसार, बेनुए राज्यातील येलेवाटा गावामध्ये शुक्रवार मध्यरात्री आणि शनिवारच्या पहाटे काही बंदुकधारी घुसले. त्यांनी अंदाधुंद गोळीबार करत 100 हून अधिक नागरिकांचा जीव घेतला. अनेक जण अद्यापही बेपत्ता असून शेकडो जखमी झाले आहे. जखमींपर्यंत आवश्यक वैद्यकीय मदतही पोहोचू शकलेले नाही. बंदुकधाऱ्यांनी अनेक कुटुंबांना घरात बंद करून जिवंत जाळले.
बेनुए राज्यात हिंसाचाराच्या घटनांमध्ये वाढ झाली आहे. बंदुकधाऱ्यांना कायद्याची भीतीच राहिली नाही. हे बंदुकधारी गावागावामध्ये जाऊन अंदाधुंळ गोळीबार करत आहेत. यामुळे या भागातील नागरीक मोठ्या प्रमाणात स्थलांतरित होत आहेत. या हल्ल्यांमध्ये सर्वाधिक शेतकरी मारले जात असून त्यांच्या स्थलांतरामुळे अन्नधान्याची टंचाई होण्याची शक्यता आहे.
बेनुए हे राज्य नायजेरियातील मध्यवर्ती भागात आहे. उत्तरेकडील मुस्लिम बहुल भाग आणि दक्षिणेकडील ख्रिश्चन बहुल भागांचा हा संगम स्थळ असून येथील जमिनीवर भूमाफियांचा डोळा आहे. या भागामध्ये गुरेढोरे चारणारे आणि शेतकरी यांच्यात जमिनीवरून मोठा संघर्ष सुरू असतो. याला जातीय आणि धार्मिक किनारही असून ते एकमेकांना ठार करत असतात.
गेल्या महिन्यामध्ये बेनुए राज्यातील ग्वेर वेस्ट जिल्ह्यात झालेल्या हल्ल्यात 42 जणांचा मृत्यू झाला होता. एसबीएफ इंटेलिजन्सने दिलेल्या अहवालानुसार, 2019 पासून झालेल्या हिंसक झटापटींमध्ये 500 हून अधिक लोकांचा मृत्यू झाला असून 22 लाख लोकांनी येथून पलायन केले आहे. मात्र याकडे नायजेरिया सरकार दुर्लक्ष करत असल्याने हल्लेखोरांचा अतिरेक वाढतच चालला आहे.
