
मुलांची शारीरिक वाढ कशी होईल याबाबत अनेक प्रश्न पालकांच्या मनात असतात. वाढत्या वयानुसार मुलांच्या शारीरिक रचनेमध्ये अनेक बदल होत असतात. तसेच वयानुसार मुलांची भूक देखील वाढत जाते. खाण्याबाबत आवडी-निवडी बदलतात. मग अशावेळी मुलांना कोणकोणते खाद्यपदार्थ द्यावे ही चिंता आईला सतावत असते. ५ वर्ष आणि त्यावरील वय वर्षाची मुलं तर शाळेमध्ये देखील जातात. यादरम्यान त्यांची शारीरिक हालचाल अधिक होते. खेळण्यामध्ये त्यांचं अधिक मन रमतं. म्हणूनच ५ वर्षाच्या मुलांना पोषक तत्त्वांचा समावेश असलेले खाद्य पदार्थ देणं गरजेचं आहे. मुलांना नियमित तुम्ही पौष्ठिक खाद्यपदार्थ खायला दिले तर त्यांचा शारीरिक विकास अधिक वेगाने होऊ शकतो. आणि मुलं सुदृढ देखील होतात. इतकंच नव्हे तर अभ्यास करण्यासाठी, खेळण्यासाठी त्यांना अधिक उर्जा देखील मिळते. तुमची मुलं जर ५ वर्षांची असतील तर त्यांना कोणते खाद्यपदार्थ द्यावेत हे पाहूया..
वाढत्या वयानुसार मुलांच्या आहारामध्ये देखील बदल होतो. मुलांच्या आवडी-निवडी देखील बदलू लागतात. मग अशावेळी मुलांचा आहार काय असावा याचा एक चार्ट तुम्ही तयार करू शकता. या वयातील मुलांना दूध, पपई, केळं, सफरचंद अशाप्रकारची फळं द्यावीत. भाज्यांमध्ये बटाटा, पालक, पनीर मुलांना द्या. दुग्धजन्य पदार्थ म्हणजेच चीज, तूपाचा देखील मुलांच्या आहारामध्ये समावेश असूद्या. अंड, काही प्रमाणास मांसाहारी पदार्थ, मुलांना द्या. सुका मेव्यामध्ये काजू, बदाम तुम्ही मुलांना देऊ शकता.
५ वर्षाच्या मुलांनी किती खावं?
वय वर्ष ५ असलेल्या मुलांच्या आहारामध्ये पोषक तत्त्वांचा समावेश असणं गरजेचं आहे. नियमित पुरेशा प्रमाणात मुलांच्या शरीराला पोषक तत्त्वांचा पुरवठा झाला पाहिजे.
1) कॅलरी – १२०० ते १४००
2) फॅट – २५ ते ३० टक्के
3) फॅट-फ्रि मिल्क – २ कप
4) मांस किंवा सोयबीन – ८५ ते ११५ ग्रॅम
5) फळं – १.५ कप
6) भाज्या – १ कप ते १.५ कप
7) धान्य – ११५ ते १४० ग्रॅम
मुलांना योग्य प्रमाणात योग्य तो आहार दिला की त्यांचा शारीरिक विकास देखील चांगल्या पद्धतीने होतो.
नाश्तासाठी काय द्यावं?
५ वर्षाच्या मुलांना नाश्तासाठी काय द्यावं याचा देखील एक चार्ट तुम्ही तयार करू शकता. धान्यापासून तयार करण्यात येणारा पॅनकेक तुम्ही मुलांना नाश्तासाठी बनवून द्या. एक वाटी दुधामध्ये पोहे भिजवून त्यात गुळ घालून तुम्ही मुलांना देऊ शकता. वर्रून एक चमचा तूप घालावे. तुम्ही त्यांना आमलेट सँडविच बनवून देऊ शकता. दूधामध्ये पुरेशा प्रमाणात प्रोटिनचा समावेश असतो. यामुळे शरीरामधील पेशी अधिक मजबूत होतात. तसेच यामुळे शारिरीक उर्जा देखील वाढते. अंड्यामध्ये समाविष्ट असलेले कोलिन, व्हिटॅमिन ए, बी आणि प्रोटिन मुलांच्या शारीरिक विकासासाठी अधिक लाभदायक ठरते. तसेच कॉर्नफ्लेक्समुळे मुलांना फॉलिक एसिड मिळतं.
नाश्तानंतर मुलांनी काय खावं?
मुलांना वाढत्या वयानुसार सतत भूक लागते. सतत शरीराची हालचाल केल्यामुळे, खेळल्यामुळे मुलांचं भूकेचं प्रमाण वाढतं. यामुळे मुलांना खायला काय द्यावं हा प्रश्न आईच्या मनात कायम असतोच. मुलांनी सकाळी नाश्ता केल्यानंतर त्यांना दोन तासांनी घरीच तयार केलेला टोमॅटो सॉस आणि धान्यापासून तयार करण्यात येणारा पास्ता बनवून द्यावा. टोमॅटोमध्ये व्हिटॅमिन सीचे प्रमाण अधिक असते. तसेच धान्यापासून तयार करण्यात आलेल्या पास्तामध्ये कार्बोहायड्रेट, फायबर आणि इतर पोषक घटक पुरेशा प्रमाणात असतात.
दुपारचं जेवण
सकाळी मुलांना स्नॅक दिल्यानंतर त्याच्या दोन तासांनी मुलांना दुपारचं जेवण द्या. दुपारच्या जेवणामध्ये मुलांना चपाती किंवा डोसा द्या. त्याचबरोबर मेथी, मटार किंवा पनीरची भाजी मुलांना द्या. मेथीमध्ये लोहचे प्रमाण अधिक असते. तसेच हिरव्या पालेभाज्यांमधून मिळणारी पोषक तत्त्वे मुलांच्या शारीरिक विकासासाठी अधिक फायदेशीर ठरतात. तसेच पनीरमध्ये देखील प्रोटिन आणि इतर प्रकारच्या पोषक घटकांचा समावेश असतो. सोयाबीन मार्फत देखील मुलांच्या शरीराला पोषक तत्त्वांचा पुरवठा होतो.
अल्पोपहार
संध्याकाळी बाहेर खेळायला जाण्यापूर्वी एखादे फळ आणि ताक द्या. खेळून आल्यावर थेट रात्रीचे जेवणच तयार ठेवा.
रात्रीचं जेवण
रात्री भाजीबरोबर पोळी किंवा भात द्या. मुग डाळ फ्राय किंवा गाजर-वाटाण्याची भाजी देखील तुम्ही मुलांना देऊ शकता. तसेच मांसाहारमध्ये तुम्ही मासे मुलांना देऊ शकता. मुगाच्या डाळीमध्ये बऱ्याच प्रमाणात प्रोटिनचा समावेश असतो. तर गाजर व्हिटॅमिन ए साठी अधिक चांगलं आहे. यामुळे मुलांच्या डोळ्यांवर चांगला परिणाम दिसू लागतो. तसेच भात आणि चपातीमध्ये कार्बोहायड्रेटचा समावेश असतो. माश्यांमध्ये प्रोटिन आणि मिनरल्सचा समावेश असतो. यामुळे मुलांचा बौद्धिक विकास होण्यास मदत मिळते.

























































