शासनाने वाळू विक्रीसंदर्भात तयार केलेल्या धोरणाला तिलांजली देत जिल्ह्यात खुलेआम वाळूतस्करी सुरू आहे. रेती घाटातून महसूल यंत्रणेच्या नाकावर टिच्चून आणि शासनाचे नियम बाजूला ठेऊन भर दिवसा जेसीबी (JCB) च्या सहाय्याने वाळू माफिया रेती उत्खनन करत असल्याचे निदर्शनास आले.
चंद्रपूर जिल्ह्यात मोठ्या प्रमाणावर अवैध रेती उत्खनन केल जात असून जिल्ह्यातील मुल तालुक्यातील मारोडा गावाजवळील उमा नदीत भर दिवसा JCB च्या मदतीने ट्रक व ट्रॅक्टर मध्ये रेती भरत असताना च चित्र कॅमेरात कैद करण्यात आलं. 10 जून पासून रेती घाट बंद करण्याचे आदेश असतानाही मोठ्या प्रमाणावर उत्खनन सुरूच असून प्रशासनाचे दुर्लक्ष होत आहे. मुल तालुक्यात आठ रेती घाट आहे आणि या आठ ही रेती घाटाचे लिलाव करण्यात आले आहे. नियम बाजूला ठेवून अजस्त्र यंत्र लावून बेसुमार रेती उपसा सुरू आहे. त्यामुळे रेती घाटांवर महसूल विभागाचे अप्रत्यक्ष सहकार्य तर नाही ना? असा सवाल उपस्थित केल्या जात आहे.
