हिंदुस्थान आणि जपानचा क्रिकेट संघ आंतरराष्ट्रीय क्रिकेटमध्ये प्रथमच एका ऐतिहासिक पुरुष टी-20 आंतरराष्ट्रीय सामन्यात एकमेकांसमोर उभे ठाकतील. जपान क्रिकेट असोसिएशन (जेसीए) आणि हिंदुस्थान क्रिकेट नियामक मंडळाने (बीसीसीआय) एका निवेदनात याबाबतची माहिती दिली आहे. दोन्ही देशांचे पुरुष संघ 22 सप्टेंबरला तोचिगी प्रांतातील सानो आंतरराष्ट्रीय क्रिकेट मैदानावर टी-20 आंतरराष्ट्रीय सामना खेळतील.
आशियाई खेळांमध्ये सहभाग
दोन्ही संघ 2026 च्या आशियाई खेळांमधील पुरुष क्रिकेट स्पर्धेत सहभागी होतील. जपान गट टप्प्यात खेळेल, तर हिंदुस्थान थेट उपांत्यपूर्व फेरी गाठेल. या वर्षाच्या सुरुवातीला आयसीसी पुरुष टी-20 विश्वचषक जिंकल्यानंतर हिंदुस्थान या सामन्याकडे आशियाई खेळांसाठी एक महत्त्वाचा सराव सामना म्हणून पाहील. जपान जगातील काही सर्वोत्तम खेळाडूंविरुद्ध खेळण्याचा अनुभव मिळवण्याचा प्रयत्न करेल.
बीसीसीआयने सांगितले की…
बीसीसीआयचे सचिव देवजित सैकिया म्हणाले, ‘हिंदुस्थान आणि जपानचा पुरुष संघ एका विशेष टी-20 आंतरराष्ट्रीय सामन्यासाठी एकत्र येत आहेत. या ऐतिहासिक प्रसंगाचा भाग बनताना बीसीसीआयला आनंद होत आहे. क्रिकेटसाठी हा एक महत्त्वपूर्ण क्षण आहे. कारण यामुळे हिंदुस्थानच्या संघाचा एका नवीन ठिकाणी प्रवास सुरू होत आहे आणि जपान व पूर्व आशियातील अधिक लोकांपर्यंत या खेळाची पोहोच वाढवण्याची संधी मिळत आहे.’
राजनैतिक संबंधांचा 75 वा वर्धापन दिन
हा टी-20 आंतरराष्ट्रीय सामना हिंदुस्थान-जपान राजनैतिक संबंधांच्या 75 व्या वर्धापन दिनाच्या सोहळय़ाची सुरुवात करेल. जपानच्या पंतप्रधान सनाए ताकाइची आणि हिंदुस्थानचे पंतप्रधान नरेंद्र मोदी यांच्यात झालेल्या शिखर परिषदेच्या चर्चेदरम्यान झालेल्या करारातून हा उपक्रम सुरू झाला आहे. या सामन्याचा उद्देश हिंदुस्थान आणि जपान यांच्यात क्रीडा क्षेत्रात लोकांमधील देवाणघेवाण आणि सहकार्याला प्रोत्साहन देणे असेल. त्याचबरोबर तसेच 2036 मध्ये ऑलिम्पिक आणि पॅरालिम्पिक खेळांचे आयोजन करण्याची हिंदुस्थानची महत्त्वाकांक्षा लक्षात घेणे हा आहे.
