रशिया आणि युक्रेनमधील युद्ध थांबायचे नाव घेत नाही. अशातच एका हिंदुस्थानी तरुणाचा धक्कादायक व्हिडीओ समोर आला आहे. शिक्षणासाठी रशियाला गेलेल्या या तरुणाने रशियन सैन्यात सहभागी होण्यासाठी आपल्यावर कसा दबाव आणला गेला, याची आपबिती या व्हिडीओद्वारे मांडली आहे. सध्या तो युक्रेनच्या ताब्यात असून त्याने तिथूनच हिंदुस्थानी सरकारकडे मदतीची मागणी केली आहे.
साहिल मोहम्मद हुसैन असे या तरुणाचे नाव आहे. तो गुजरातच्या मोरबी जिह्यातील रहिवासी आहे. साहिल विद्यार्थी व्हिसावर रशियामध्ये शिक्षण घेण्यासाठी आला होता. अभ्यासासोबतच तो एका कुरिअर कंपनीत पार्टटाईम काम करायचा. मात्र रशियन पोलिसांनी त्याला ड्रग्जच्या तस्करीप्रकरणी अटक केल्याचा आरोप त्याने केला आहे. या प्रकरणातून सुटका हवी असेल तर रशियन सैन्यात भरती होऊन युद्धात लढावे लागेल, अशी अट त्याला घालण्यात आली होती. या भीतीपोटी आणि कायदेशीर कचाटय़ातून वाचण्यासाठी त्याने रशियन सैन्याचा प्रस्ताव स्वीकारला, असे त्याने व्हिडीओमध्ये म्हटले आहे. साहिलने दिलेल्या माहितीनुसार, रशियन सैन्यात भरती झाल्यावर त्याला लगेचच 15 दिवसांचे ट्रेनिंग देऊन युद्धात पाठवले.
सरकारला विनंती
साहिलने हिंदुस्थान सरकारला विनंती केली आहे की, त्यांनी रशियाचे अध्यक्ष व्लादिमीर पुतीन यांच्याशी चर्चा करून त्याची सुरक्षित सुटका करावी आणि त्याला पुन्हा हिंदुस्थानात आणण्यासाठी प्रयत्न करावेत. साहिलच्या आईने मुलाला सुरक्षित हिंदुस्थानात आणण्यासाठी दिल्ली कोर्टात याचिका दाखल केली आहे. या प्रकरणाची पुढील सुनावणी फेब्रुवारीमध्ये होणार आहे.
