दुबईतील एक ब्रोकरेज फर्म एका रात्रीत गायब झाली आणि गुंतवणूकदारांच्या निधीतून लाखो दिऱ्हाम घेऊन गेली. गेल्या महिन्यापर्यंत, गल्फ फर्स्ट कमर्शियल ब्रोकर्सचे दुबईच्या बिझनेस बे येथील कॅपिटल गोल्डन टॉवरमध्ये दोन ऑफिसेस होती. या आॅफिसमधून त्यांचे सुमारे 40 कर्मचारी सतत फॉरेक्स ऑफरसह गुंतवणूकदारांना कॉल करत होते. खलीज टाईम्सने दिलेल्या वृत्तानुसार, सध्याच्या घडीला ही दोन्ही आॅफिसेस बंद असून, गुंतवणूकदारांची फसवणूक झाली आहे.
एका रात्रीत कंपनी बंद झाल्यामुळे, गुंतवणूकदार आता आॅफिसचे दरवाजे ठोठोवू लागले आहेत. केरळमधील मोहम्मद आणि फयाज पोयल यांचीही या कंपनीमध्ये गुंतवणूक होती. त्यांनी गल्फ फर्स्ट कमर्शियल बँकर्समध्ये $75,000 गुंतवले होते. कंपनीच्या कार्यालयात ते शोध घेत आले असता, तिथे त्यांना फक्त रिकामे कार्यालय दिसले. उपलब्ध असलेल्या प्रत्येक नंबरवर फोन केला, पण कोणीही प्रतिसाद दिला नाही. जणू काही ते कधीच अस्तित्वात नव्हते,” असे कॅपिटल गोल्डन टॉवरमधील फर्मच्या कार्यालयात गेलेले पोयल म्हणाले.
बहुतेक गुंतवणूकदारांनी सांगितले की ते त्यांचे पैसे केवळ फोन संभाषणाद्वारे फर्ममध्ये गुंतवण्यास राजी झाले होते. “माझ्या रिलेशनशिप मॅनेजरने मला $1,000 ची सुरुवातीची ठेव करण्यास राजी केले. कालांतराने, सुरळीत व्यापार आणि लवकर नफ्याच्या भ्रमाने मला अधिक निधी जोडण्यासाठी दबाव आणला गेला,” असे पोयल यांनी अधिक बोलताना म्हटले आहे.
सध्याच्या घडीला दुबई पोलिसांनी दोन्ही कंपन्यांविरुद्ध तक्रार दाखल केली आहे. गल्फ फर्स्ट आणि सिग्मा-वन. त्यांच्या चौकशीत असे दिसून आले की, सिग्मा-वन कॅपिटल दुबई फायनान्शियल सर्व्हिसेस अथॉरिटी (DFSA) किंवा सिक्युरिटीज अँड कमोडिटीज अथॉरिटी (SCA) कडून परवानगी न घेता काम करते.
कंपनीने दावा केला की तिची कॅरिबियनमधील सेंट लुसिया येथे नोंदणी आहे आणि मुसल्ला टॉवरमध्ये बर दुबई कार्यालय आहे, परंतु असे कोणतेही कार्यालय अस्तित्वात नाही. चौकशीत असे आढळून आले की कंपनी कधीही तेथे कार्यरत असल्याचे कोणतेही रेकॉर्ड नाही.
