देशभरात लोकसभा निवडणूकीची धामधूम सुरू आहे. सर्वत्र प्रचारसभा सुरू आहेत. यात सध्या देशात भाजपविरोधी वातावरण असल्यामुळे भाजप नेत्यांकडून कमरेखालची टीका केली जात आहे. भाजप उमेदवार सुधीर मुनगंटीवार यांनी काँग्रेसबाबत केलेली आक्षेपार्ह टीका ताजी असतानाच आता कर्नाटकातील एका भाजप नेत्याने महिला मंत्र्याबाबत वादग्रस्त वक्तव्य केलं आहे.
बेळगाव ग्रामीणचे भाजपा पक्षाचे माजी आमदार संजय पाटील यांनी विद्यमान आमदार आणि कर्नाटकच्या मंत्री लक्ष्मी हेब्बाळकर यांच्यावर अत्यंत खालच्या दर्जाची टीका केली. शनिवारी एका प्रचार सभेत बोलताना हेब्बाळकर यांच्याबाबत पाटील यांनी वादग्रस्त वक्तव्य केलं.
”बेळगाव येथील महिला भाजपला पाठिंबा देत आहेत. त्यात माजी मंत्री रमेश जारकीहोळी भाजपसोबत आले आहेत. त्यामुळे मंत्री लक्ष्मी हेब्बाळकर यांना धक्का बसला असून त्यांची रात्रीची झोपही उडाली आहे. त्यामुळे रात्री झोपण्यासाठी त्यांना एक पेग जास्तीचा घ्यावा लागत असेल’, अशी टीका संजय पाटील यांनी केली.
यावर उत्तर देताना हेब्बाळकर यांनी संजय पाटील व भाजपवर जोरदार टीकास्त्र सोडलं. ”संजय पाटील यांनी फक्त माझाच नाही तर राज्यातील स,र्व महिलांचा अपमान केला आहे. भाजपमध्ये महिलांबद्दल कसा दृष्टीकोन आहे ते यातून दिसून येते. भाजपचे नेते राम नामाचा जप करतात. बेटी बचाओ बेटी पढाओ म्हणतात पण प्रत्यक्षात त्यांच्या मनात काय सुरू असते ते संजय पाटील यांच्या ओठावर आले आहे, असे हेब्बाळकर म्हणाल्या.
