स्वारगेट डेपोमध्ये घडलेल्या बलात्काराच्या घटनेने एसटी प्रशासनाबरोबर राज्य सरकारवरही टीकेचा भडीमार होत आहे. त्या पार्श्वभूमीवर आज परिवहनमंत्र्यांनी वरिष्ठ अधिकाऱ्यांची तातडीची बैठक घेतली. राज्यातील एसटी डेपोंचे तातडीने सुरक्षा ऑडिट केले जाणार असून एसटी डेपोंमधील भंगार गाड्या लवकरात लवकर हटवण्याचे निर्देश या बैठकीत देण्यात आले. डेपोंमध्ये महिला सुरक्षा रक्षकांची संख्या वाढवण्याच्या सूचनाही देण्यात आल्या.
एसटी डेपोंमधील महिला प्रवाशांच्या सुरक्षेविषयक आढावा घेण्यासाठी परिवहनमंत्री प्रताप सरनाईक यांच्या उपस्थितीत अपर मुख्य सचिव (परिवहन) यांच्या दालनात बैठक घेण्यात आली. या बैठकीला परिवहन विभागाचे अपर मुख्य सचिव व एसटी महामंडळाचे अध्यक्ष संजय सेठी, परिवहन आयुक्त व एसटी महामंडळाचे उपाध्यक्ष व व्यवस्थापकीय (प्रभारी) विवेक भीमनवार, सहसचिव राजेंद्र होळकर, एसटी महामंडळाचे अधिकारी उपस्थित होते.
- बस स्थानक व आगारांमध्ये उभ्या ठेवण्यात आलेल्या बसेस व परिवहन कार्यालयांकडून कारवाईमध्ये जप्त केलेल्या वाहनांचे 15 एप्रिलपर्यंत निष्कासन करा
- राज्य परिवहन महामंडळाकडील मुख्य सुरक्षा व दक्षता अधिकारीपदी आयपीएस अधिकाऱ्याची नियुक्ती करण्यासाठी गृह विभागाला विनाविलंब प्रस्ताव द्या.
- एसटी बस स्थानके व आगारांमध्ये सीसीटीव्हीची एआय तंत्रज्ञानावर आधारित अद्ययावत यंत्रणा उभारा.
- नवीन येणाऱ्या बसेसमध्ये सीसीटीव्ही आणि जीपीएस यंत्रणा बसविण्याचे काम गतीने पूर्ण करा.
- पोलिसांची मदत घेऊन डेपोत त्यांची गस्त वाढवा.
- डेपो मॅनेजर हे डेपोचे पालक असल्यामुळे त्यांनी तेथील निवासस्थानामध्येच वास्तव्य करावे.
- डेपोत काम करणाऱ्या प्रत्येक एसटी कर्मचाऱ्याने ओळखपत्र लावणे बंधनकारक.
- बस स्थानक अथवा डेपोमध्ये आलेल्या प्रत्येक बसची नोंदणी सुरक्षा रक्षकाकडे व्हावी.
- चालक-वाहक यांनी आगारात त्यांनी आणलेली बस सोडताना दरवाजे बंद करण्याची काळजी घ्यावी. साध्या बसेसमध्ये दरवाजासह खिडक्याही बंद कराव्यात.
- सुरक्षा रक्षकांनी डेपो परिसरात फिरणाऱ्या अनोळखी इसमांवर लक्ष ठेवून त्यांच्यावर योग्य ती कारवाई करावी.
- डेपोंमधील स्वच्छतेबाबत कुठलीही तडजोड नसावी. प्रत्येक बसस्थानकावर महिलांसाठी स्वच्छतागृहाची व्यवस्था करण्यात यावी. स्वच्छतागृहे प्रशस्त असावीत. एसटीच्या वरिष्ठ अधिकाऱ्यांनी स्वच्छतेचा वेळोवेळी आढावा घ्यावा, असेही निर्देश मंत्री सरनाईक यांनी अधिकाऱ्यांना दिले.
