मराठी रंगभूमी ही महाराष्ट्रातील नाटय़परंपरेचा अत्यंत समृद्ध आणि महत्त्वाचा भाग आहे. या महान परंपरेचा वारसा लाभलेल्या मराठी रंगभूमीचे पडसाद आता युरोपमध्येही उमटू लागले आहेत. याच नाटय़कलेच्या समृद्ध परंपरेने प्रेरित होऊन 4 आणि 5 एप्रिल रोजी नेदरलँड्स येथे युरोपमधील पहिली एकांकिका स्पर्धा अभिमंच थिएटरतर्फे आयोजित केली आहे.
या स्पर्धेसाठी इंग्लंड, जर्मनी, स्वित्झर्लंड, बेल्जियम आणि नेदरलँड्समधूनही उत्तुंग प्रतिसाद मिळाला आहे. या 2 दिवसांमध्ये तब्बल 14 एकांकांची मेजवानी नाटय़प्रेमींना अनुभवता येणार आहे. प्रसिद्ध दिग्दर्शक विजय पेंकरे, अभिनेते संजय मोने परीक्षकांची भूमिका बजावणार आहेत. यानिमित्ताने युरोपमध्ये मराठी नाटय़कलेचा जागर घडणार आहे.
