म्हाडातर्फे मुंबईतील 149 दुकानांचा ई-लिलाव करण्यात येणार आहे. गोरेगाव, पवई, मुलुंड, कुर्ला, बोरिवली अशा विविध भागांमध्ये ही दुकाने आहेत. अगदी 23 लाखांपासून ते 12 कोटी 63 लाख रुपयांपर्यंत या दुकानांच्या किमती आहेत. विशेष म्हणजे, गेल्या लिलावात विक्री न झालेल्या गोरेगावच्या बिंबिसार नगरमधील दुकानाचादेखील यंदाच्या लॉटरीत समावेश आहे.
दुकानांच्या या लिलावात मुलुंड गव्हाणपाडा येथील 6, कुर्ला-चुनाभट्टी स्वदेशी मिल येथील 5, तुंगा पवई येथील 2, कोपरी पवईतील 23, चारकोपमधील 23, जुने मागाठाणे येथील 6, महावीर नगर कांदिवली पश्चिम येथील 6, प्रतीक्षा नगर येथील 9, अॅण्टॉप हिल येथील 3, मालवणीमधील 46, गोरेगाव बिंबिसार नगर येथील 17 दुकानांचा व गोरेगावच्या शास्त्राr नगर आणि सिद्धार्थ नगर, जोगेश्वरी मजासवाडी येथील प्रत्येकी एक दुकान विक्रीसाठी उपलब्ध आहे.
n बॅँक किंवा एटीएमसाठी आरक्षित असलेल्या बिंबिसार नगरमधील या दुकानाची बेस प्राईज गेल्या लिलावात 13 कोटी 93 लाख रुपये होती. यंदाच्या लिलावात या दुकानाची बेस प्राईज कमी करून 12 कोटी 63 लाख रुपये ठेवल्याची माहिती सूत्रांनी दिली. त्यामुळे आता तरी या दुकानाची विक्री होणार का, याकडे साऱ्यांचे लक्ष लागले आहे.
29 ऑगस्टला निकाल
ई-लिलाव नोंदणी व अर्ज प्रक्रियेला 12 ऑगस्टपासून सुरुवात होणार आहे. 28 ऑगस्टला सकाळी 11 वाजल्यापासून सायंकाळी 5 वाजेपर्यंत पात्र ठरलेल्या अर्जदारांसाठी ऑनलाइन बोली स्वरूपातील ई-लिलाव www.eauction.mhada.gov.in या संकेतस्थळावर होणार आहे. 29 ऑगस्टला सकाळी 11 वाजता https://eauction.mhada.gov.in व https://mhada.gov.in या दोन्ही संकेतस्थळांवर ई-लिलावाचा निकाल जाहीर करण्यात येणार आहे.
