सामना प्रतिनिधी। नगर
बनावट भूसंपादन दाखला तयार करून त्या दाखल्याच्या आधारे प्रकल्पग्रस्ताचे प्रमाणपत्र मिळवून सरकारी नोकरी मिळविणार्‍यांचे रॅकेट उघडकीस आल्यानंतर बनावट दाखले तयार करणार्‍या आरोपीला पोलिसांनी गजाआड केले. दाखल्यासाठी पाच ते सहा हजार रुपये घेतल्यानंतर प्रकल्पग्रस्ताचे प्रमाणपत्र दिले होते. प्रकल्पग्रस्ताचे प्रमाणपत्र देण्यासाठी जिल्हाधिकारी कार्यालयातील पुनर्वसन कार्यालयातील कर्मचारी काही पैसे घेत होते, अशी माहिती तपासात आरोपी देत असल्याने या कर्मचार्‍यांवर पोलिसांचा संशय बळवला आहे.
बनावट कागदपत्रांच्या आधारे प्रकल्पग्रस्तांचे प्रमाणपत्र मिळविल्याचा प्रकार तीन महिन्यांपूर्वी उघडकीस आला होता. नगर तालुक्यातील बारदरी येथील किरण तोडमल याला प्रकल्पग्रस्तांसाठी राखीव असलेल्या जागेवर ठाणे शहर पोलीस दलात नोकरी लागली होती. त्यासाठी नगर जिल्हाधिकारी कार्यालयातून मिळालेला प्रकल्पग्रस्ताचे प्रमाणपत्र तोडमल याने कागदपत्रात दिले होते. या प्रमाणपत्राच्या पडताळणीत बनावट कागदपत्रे तयार करून हा दाखला मिळविल्याचे भूसंपादन कार्यालयात उघडकीस आले. त्यानुसार नोकरी मिळविणार्‍या किरण सुरेश तोडमल, सुरेश विठोबा तोडमल, मधुकर भास्कर तोडमल, अमोल मधुकर तोडमल या चौघांविरुद्ध कोतवाली पोलिस स्टेशनला गुन्हा नोंदविण्यात आल्यानंतर पोलिसांनी तपास सुरू केला होता. यातील तिघांना अटक करून त्यांच्याकडे तपास सुरू केल्यानंतर बनावट दाखला तयार करणार्‍या अमोल भीमराव धाडगे याची माहिती मिळाल्यानंतर पोलिसांनी त्याचा शोध सुरू केला. तपास अधिकारी पोलीस उपनिरीक्षक शिवाजी नागवे व इतर पोलीस कर्मचार्‍यांनी तीन दिवसांपूर्वी त्याला नागरदेवळे येथील त्याच्या घरातून अटक केली. आरोपी धाडगे हा पोलीस कोठडीत आहे. तपासात त्याच्याकडून बनावट कागदपत्रांबाबत माहिती मिळत आहे. 2012 मध्ये किरण तोडमल हा जिल्हाधिकारी कार्यालयात कामाला असलेल्या अमोल घाडगे याला भेटला. त्यानंतर त्याचे भाऊ, वडील भेटल्यानंतर प्रकल्पग्रस्ताचा दाखला मिळविण्यासाठी प्रकरण करण्याचे ठरले. एक हजार रुपये अ‍ॅडव्हान्स मिळाल्यानंतर दाखल तयार करून तो देण्यात आला. त्यानंतर किरण तोडमल याला पुनर्वसन शाखेत बोलवून दाखला देण्यात आल्यानंतर आणखी पाच हजार रुपये दिले. त्यातील काही पैसे इतर कर्मचार्‍यांना देत होते, असे आरोपी सांगत आहेत. त्यामुळे पुनर्वसन शाखेतील कर्मचार्‍यांची चौकशी होण्याची शक्यता आहे. चार दिवसांपूर्वी आणखी एक बनावट प्रमाणपत्राप्रकरणीच गुन्हा नोंदविण्यात आला होता. सोलापूर जिल्ह्यात भरती झालेल्या पोलिस कर्मचार्‍याने बनावट दाखला दिल्याचे उघडकीस आले. त्यानंतर त्याच्याविरुद्ध गुन्हा नोंदविण्यात आला आहे. बनावट दाखल्याच्या गुन्ह्याची व्याप्ती वाढण्याची शक्यता आहे.
दोन वर्षांत धाडगे याने कार्यालयातील इतर कर्मचार्‍यांच्या मदतीने 40 ते 50 प्रकल्पग्रस्तांची प्रमाणपत्रे दिली आहेत. त्यातील काही प्रमाणपत्रे खरी व काही बनावट असल्याची माहिती आरोपी देत आहे. खरी कागदपत्रे घेऊन देणार्‍या दाखल्यासाठी पाच हजार रुपये घेतले जात होते. त्यातील काही पैसे दोन कर्मचार्‍यांना देण्यात येत होते. परंतु, पैशावरून वाद झाल्यानंतर धाडगे याला कामावरून काढून टाकण्यात आले होते.
भूसंपादनाचे बनावट दाखले तयार करण्यासाठी आरोपीने अधिकार्‍यांचे बनावट शिक्के तयार केले होते. कम्प्युटरद्वारे भूसंपादनाचा बनावट दाखले करून त्यावर शिक्के मारून दाखला खरा असल्याचे भासवून इतर कागदपत्रे तयार करून प्रकल्पग्रस्तांचा दाखला मिळविला जात होता. पोलिसांनी आरोपीच्या घरातून बनावट शिक्के, कम्प्युटर, प्रिंटर असे साहित्य जप्त केले आहे. आरोपी धाडगे हा केवळ बारावी शिकलेला आहे.
