नगर अर्बन बँक- दुसरा गैरप्रकार उघड, चिंचवडला तो गुन्हा अखेर दाखल

नगरमधील शतक महोत्सवी परंपरा असलेल्या प्रसिद्ध नगर अर्बन मल्टीस्टेट शेड्युल्ड बँकेतील दुसरा गैरप्रकार अखेर उघड झाला आहे. 22 कोटीच्या या कर्जवाटपाबाबतचा तो चर्चित असलेला गुन्हा अखेर पुणे जिल्ह्यातील चिंचवड येथे दाखल झाला आहे.

यात संबंधित कर्जदारांसह बँकेची कर्ज उपसमिती तसेच बँकेचे माजी अध्यक्ष व भाजपचे नगरचे माजी खासदार दिलीप गांधी यांच्या नेतृत्वाखालील संचालक मंडळाला आरोपी करण्यात आले आहे. अर्थात संचालक मंडळातील ज्या सदस्यांनी संबंधित 22 कोटीच्या कर्जास मंजुरी दिली, त्यांचा यात समावेश आहे.

महिनाभरापूर्वीच बँकेच्या 3 कोटीच्या बोगस कर्ज प्रकरणी नगरच्या कोतवाली पोलिसात गुन्हा दाखल झाला आहे. त्यानंतर आता बँकेच्या चिंचवडच्या शाखेतील गैरप्रकाराबद्दल गुन्हा दाखल झाला आहे. आता प्रतीक्षा शेवगाव शाखेतील बनावट सोनेतारण प्रकरणातील गुन्ह्याची आहे. दरम्यान, नगर अर्बन बँकेच्या चिंचवड शाखेत 22 कोटीच्या कर्ज प्रकरणात गुन्हा दाखल करण्याची मागणी नगर अर्बन बँक बचाव कृती समितीने करून मागच्या आठवड्यात प्रशासक सुभाषचंद्र मिश्रा यांच्या दालनात ठिय्या आंदोलन केले होते.

त्याचवेळी प्रशासक मिश्रा यांनी बँकेचे प्रमुख व्यवस्थापक (वसुली) महादेव साळवे यांना संबंधित गुन्हा दाखल करण्याचे आदेश दिले होते. त्यांनी 21 जानेवारीला चिंचवडला जाऊन सविस्तर तक्रार अर्ज दिला होता. त्याचा अभ्यास केल्यानंतर चिंचवड पोलिसांनी 25 जानेवारीला भारतीय दंड संहिता कलम 34, 420, 465, 467, 468 व 471 अन्वये कर्जदार बबन चव्हाण, वंदना चव्हाण, यज्ञेश चव्हाण तसेच मंजूदेवी हरिमोहन प्रसाद, रामचंद्र तांबिले (सर्व रा. चिंचवड), अभिजीत नाथा घुले (रा. बुरुडगाव रोड, नगर) यांच्यासह बँकेच्या कर्ज उपसमितीमधील सदस्य व नगर अर्बन बँकेच्या संचालक मंडळाचे सदस्य यांच्याविरुद्ध गुन्हा दाखल केला आहे. यामुळे नगरमध्ये खळबळ उडाली आहे.

चिंचवड पोलिसात दाखल असलेल्या या गुन्ह्याची फिर्याद प्रमुख व्यवस्थापक महादेव साळवे यांनी दिली आहे. बँकेचे प्रशासक सुभाषचंद्र मिश्रा यांच्या आदेशानुसार ही तक्रार देत असल्याचे त्यांनी यात स्पष्ट केले आहे.

 

आपली प्रतिक्रिया द्या