कामठी मार्गावरील डबल डेकर व्हायाडक्ट हा मेट्रो व हायवे वाहतुकीसाठी 5.637 कि.मी. लांबीचा सिंगल कॉलम पिलरवर उभा असून हे स्थापत्य कलेचे अद्भुत उदाहरण आहे. तंत्रज्ञानाचा उपयोग करून बांधलेल्या या उड्डाणपुलाची गिनिज बुक ऑफ वर्ल्ड रेकार्डतर्फे नोंद घेतली आहे.
वास्तुकलेच्या या निर्मितीमुळे शहराला पायाभूत सुविधांचे शहर म्हणून नवीन ओळख मिळाली. या पुरस्काराने नागपूरचा गौरव जागतिक स्तरापर्यंत पोहचला. या डबल डेकर पुलाच्या निर्मितीसोबतच कामठी मार्गावर रेल्वे, महामार्ग वाहतूक तसेच मेट्रो वाहतुकीसाठी जगात प्रथमच अशा प्रकारच्या उड्डाणपूल तयार करण्यात आला आहे. हे जगातील प्रमुख अभियांत्रिकीमधील आश्चर्य आहे, असे महामेट्रोचे व्यवस्थापकीय संचालक श्रावण हर्डीकर यांनी सांगितले.
रामगीरी येथे मुख्यमंत्री देवेंद्र फडणवीस यांच्या विशेष उपस्थितीत गिनिज वर्ल्ड रेकॉर्डचे भारतातील प्रतिनिधी स्वप्नील डोंगरीकर यांनी महामेट्रोचे व्यवस्थापकीय संचालक श्रावण हर्डीकर यांना गिनिज वर्ल्ड रेकार्डमध्ये नोंद झाल्याचे प्रमाणपत्र प्रदान केले. गिनिज बुक ऑफ वर्ल्ड रेकार्डचे प्रतिनिधी यावेळी उपस्थित होते.
