निफाड तालुक्यात अवकाळी पावसाचा द्राक्षबागांना फटका

437

निफाड तालुक्यात शुक्रवारी झालेल्या अवकाळी पावसाने जोरदार तडाखा दिला आहे. कांदे, ऊस, सोयाबीन, मका व भाजीपाला पिकांत मोठय़ा स्वरूपात पाणी साचल्याने सगळीकडे शेतात तळेच तळे साचल्याने चित्र दिसत आहे. त्यामुळे पिकांच्या उत्पादनावर परिणाम होणार आहे. पावसामुळे आणि ढगाळ वातावरण यामुळे उन्हाळ कांद्याच्या रोपांचे नुकसान झाले आह.s निफाड तालुक्यात झालेल्या अवकाळी व गारांच्या पावसामुळे निफाड, श्रीरामनगर, या गावात द्राक्ष पिकांचे मोठया प्रमाणावर नुकसान झाले आहे.

तालुक्यातील निफाड, वनसगाव, खडकमाळेगाव, सारोळे, खानगाव, कोटमगाव, उगाव, विंचूर, गोंदेगाव, वाहेगाव, दहेगाव, भरवस, नैताळे रामपूर कोळवाडी सोनेवाडी, शिवडी, खेडे, करंजगाव, शिंगवे, म्हाळसाकोरे, भुसे, नांदुर्डी, जळगाव, काथरगाव, कुरडगाव आदी गावांना मुसळधार पावसाने झोडपले.गेल्या महिनाभरापासून दररोज पाऊस अन ढगाळ हवामान होते. त्यातच शुक्रवारी सायंकाळी या परिसरातील गावामध्ये मुसळधार पाऊस झाला. त्यामुळे नद्या, नाले, ओहोळ दुथडी भरून वाहिले.

श्रीरामनगर, निफाड परिसरात काही काळ या पावसावरोबरच गारांचा मारा झाला त्यामुळे द्राक्ष पिकाचे आतोनात नुकसान झाले आहे. बहुतांशी भागांमधील द्राक्ष घड गळून गेल्याने शेतकऱयांचे लाखो रुपयांचे नुकसान झाले आहे. द्राक्षबागांच्या गोडय़ाबार छाटण्या जवळपास अंतिम टप्यात आहेत, मात्र छाटणी झालेल्या द्राक्षबागांत जास्त काळ पावसाचे पाणी साचून राहत असल्याने द्राक्षबागेचे मूळ बंद पडत आहे. याचा परिणाम द्राक्षबागेच्या ओलांडय़ावर मूळ फुटत आहे. शिवाय द्राक्षबाग छाटणीनंतर निघणाऱया फुटव्यातील द्राक्षमाल अत्यल्प प्रमाणात निघत आहे. तसेच निघालेला द्राक्षमाल जिरत आहे तर काही घडांचा आकार गोल गोळीसारखा होऊन गळून जात आहे. सर्वाधिक प्रमाणात पोंगा तसेच फुलोरा अवस्थेतील द्राक्षबागांचे नुकसान झाले असून या बागांवर फवारणी करूनही पीक हातात येण्याची शक्यता राहिली नसल्याने द्राक्ष उत्पादक बेजार झाले आहेत.

द्राक्षवेलीवर सूर्यप्रकाश न पडल्याने थेट काडीला मुळ्या फुटत आहेत. द्राक्षवेलीचे अंतर्गत कार्य थांबून उत्पादनाला फटका बसत आहे. द्राक्षबागेत पाणी साचून राहिल्याने द्राक्षाची मुळे बंद पडत आहेत. परिणामी द्राक्षवेलीच्या काडीला मुळी फुटत असल्यामुळे द्राक्षवेलीवरील घडांची वाढ खुंटत आहे. घड जिरण्याचे प्रमाण वाढत आहे.
शिवसेनेचे पंचायत समितीचे सदस्य शिवा सुरासे यांनी द्राक्षबागांची व इतर पिकांची पाहणी केली. नुकसानग्रस्त शेतकऱयांनी तातडीने तलाठी, सर्कल यांच्याशी संपर्क साधून नुकसानग्रस्त पिकांचे पंचनामे करून घेण्याचा सूचना केल्या.

आपली प्रतिक्रिया द्या