नोयडातील कॉलेजमध्ये सुरक्षा रक्षक विद्यार्थ्यांमध्ये तुफान राडा, 33 जणांना पोलिसांनी घेतले ताब्यात

बातमी शेअर करा :
सामना फॉलो करा

नोयडामधील गौतम बुद्ध विद्यापीठात रविवारी रात्री मेडिकलचे विद्यार्थी व सुरक्षा रक्षकांमध्ये तुफान राडा झाला. पोलिसांनी घटनास्थळी धाव घेत त्या ठिकाणाहून 33 जणांना ताब्यात घेतले.

काही विद्यार्थी विद्यापीठाच्या कॅम्पसमध्ये असलेल्या मुन्शी प्रेमचंद हॉस्टेलजवळ उभं राहून सिगारेट पित होते. त्यावेळी सुरक्षा रक्षकांनी त्यांना हटकले. त्यावरून विद्यार्थी व सुरक्षा रक्षकांमध्ये वाद झाला. हा वाद इतका वाढला की आजुबाजूचे विद्यार्थी व सुरक्षा रक्षकही त्यात सहभागी झाले. त्यानंतर लाठ्या काठ्यांनी एकमेकांना मारहाण करण्यापासून ते कॅम्पसमधील गाड्या फोडण्यापर्यंत हे प्रकरण पोहोचलं.

याचदरम्यान कुणीतरी याबाबत पोलिसांना कळविल्यानंतर पोलीस घटनास्थळी पोहोचले. त्यांनी हाणामारी करणाऱ्या 33 जणांना ताब्यात घेतले आहे. विद्यापीठातील या हाणामारीचे व्हिडीओ सोशल मीडियावर व्हायरल झाले आहेत.