
देशभरात NEET परीक्षांचा विषय गाजत आहे. या मुद्द्यावरून राजकीय वातावरण तापले आहे. तसेच हजारो विद्यार्थ्यांच्या भवितव्याचा हा प्रश्न आहे. देशभरात विद्यार्थ्यांनी आक्रमक भूमिका घेतल्याने आता केंद्राने मोठा निर्णय घेत राष्ट्रीय परीक्षा मंडळाचे प्रमुख NTA DG सुबोध कुमार यांची हकालपट्टी केली आहे. तसेच विद्यार्थ्यांची मागणी लक्षात घेत NEET-PG पुढे ढकलण्यात आली आहे. नीट पीजी परीक्षा अनिश्चित काळासाठी पुढे ढकलली असून परीक्षेची नवीन तारीख लवकरच जाहीर केली जाईल, असे शिक्षण मंडळाकडून सांगण्यात आले.
NEET परीक्षेत हेराफेरी आणि पेपर लीक प्रकरणी कारवाई करत केंद्र सरकारने मोठी कारवाई करत NTA DG सुबोध कुमार यांना पदावरून हटवलं आहे. तसेच प्रदीपसिंग खरोना यांच्याकडे राष्ट्रीय परीक्षा मंडळाचा अतिरिक्त पदभार सोपवण्यात आला आहे.
आरोग्य मंत्रालयाने याबाबत अधिकृत प्रसिद्धीपत्रक जारी करताना म्हटलं आहे की, काही स्पर्धात्मक परीक्षांमध्ये घोळ झाल्याच्या आरोपांच्या अलीकडील घटना लक्षात घेत, राष्ट्रीय परीक्षा मंडळाद्वारे आयोजित केलेल्या NEET-PG प्रवेश परीक्षेच्या प्रक्रियेचे सखोल मूल्यांकन करण्याचा निर्णय घेतला आहे. त्यानुसार, खबरदारीचा उपाय म्हणून 23 जून 2024 रोजी होणारी NEET-PG प्रवेश परीक्षा पुढे ढकलण्याचा निर्णय घेण्यात आला आहे. या परीक्षेची नवीन तारीख लवकरात लवकर कळवण्यात येईल. विद्यार्थ्यांना झालेल्या गैरसोयीबद्दल आरोग्य मंत्रालय मनापासून दिलगीर आहे. विद्यार्थ्यांच्या हितासाठी आणि परीक्षा प्रक्रियेचे पावित्र्य राखण्यासाठी हा निर्णय घेण्यात आला आहे.




























































