शेतात खुरपणी करत असताना आंबेगाव येथील लांडेवाडी-चिंचोडी येथे एका महिलेवर बिबट्याने हल्ला केला. मंगळवारी दुपारी चारच्या सुमारास ही घटना घडली. या हल्ल्यात महिला जखमी झाली आहे. वनविभागाने तात्काळ घटनास्थळी धाव घेत महिलेला मंचर उपजिल्हा रुग्णालयात दाखल केले. महिलेची प्रकृती आता स्थिर असल्याची माहिती वनपरिक्षेत्र अधिकारी विकास भोसले यांनी दिली.
लांडेवाडी चिंचोली येथील बोंबले वस्ती येथे शेतात खुरपणीचे काम करत असणाऱ्या कमल प्रकाश बोंबले (40) यांच्यावर बिबट्याने हल्ला केला. उसाच्या शेतातून बिबट्याने अचानक येऊन त्यांच्यावर हल्ला केला. मात्र त्यांनी सावध होऊन हल्ला परतवण्याचा प्रयत्न केला. या घटनेत त्यांच्या हातावर बिबट्याचे दोन दात लागल्याने त्या जखमी झाल्या आहेत.
या घटनेची माहिती मिळताच मंचर वनविभागाचे वनपरिक्षेत्र अधिकारी विकास भोसले यांनी तात्काळ वनरक्षक शिवाजी ढोले, वनरक्षक पी, एम. कांबळे यांना घटनास्थळी पाठवले कमल बोंबले यांना मंचर येथील उपजिल्हा रुग्णालयात दाखल केले असून त्यांच्यावर रुग्णालयात उपचार सुरू आहेत. बिबट्याला जेरबंद करण्यासाठी पिंजरा लावण्याची मागणी ग्रामस्थांनी केली आहे.
