आगामी स्थानिक स्वराज्य संस्था निवडणुकीच्या तयारीला लागा, अशा सूचना महाराष्ट्र नवनिर्माण सेनेचे अध्यक्ष राज ठाकरे यांनी इगतपुरीतील शिबिरात पदाधिकाऱ्यांना दिल्या. इगतपुरी येथील हॉटेल कॅमल व्हॅलीमध्ये सोमवारपासून महाराष्ट्र नवनिर्माण सेनेचे तीन दिवसीय शिबीर सुरू आहे. अध्यक्ष राज ठाकरे, अमित ठाकरे यांच्यासह नेते व पदाधिकारी येथे दाखल झालेले आहेत. स्थानिक स्वराज्य संस्थांच्या निवडणूक तयारीला लागा. मतदार याद्यांवर बारकाईने काम करा, अशा सूचना त्यांनी दिल्या. दुपारी तीनच्या सुमारास राज ठाकरे, अमित ठाकरे मुंबईकडे रवाना झाले. मनसे नेते बाळा नांदगावकर यांच्यासह पदाधिकारी इगतपुरीतच आहेत. उद्या बुधवारी शिबिराचा समारोप होणार आहे.
