उल्हासनगर महापालिकेत सुरू असलेल्या अधिकाऱ्यांच्या संगीत खुर्चीमुळे नगररचना विभागाचा कारभार ढेपाळला आहे. अधिकाऱ्यांच्या अदला-बदलींचा खेळ सुरू असल्याने बांधकाम परवाना, अनधिकृत बांधकामे नियमितपणे करण्याच्या प्रक्रिया ठप्प पडल्या आहेत. याचा परिणाम पालिकेच्या महसुलावर झाला आहे. प्रशासनाच्या या अजबगजब कारभारामुळे आश्चर्य व्यक्त होत आहे.
उल्हासनगर महापालिकेत नियुक्त करण्यात आलेले नगररचना सहाय्यक संचालक ललित खोब्रागडे यांच्या जागी भिवंडी महानगरपालिकेतील नगररचना सहाय्यक संचालक अजय साबळे यांच्याकडे प्रभारी पदभार सोपवण्यात आला. साबळे यांना जेमतेम पंधरा दिवस होत नाही तोच त्यांच्या जागी ठाणे पालिकेमधील नगररचना सहाय्यक संचालक राजेंद्र हेले यांची वर्णी लावण्यात आली. त्यांना हे पद देण्यात आले तेव्हा त्यांच्या सेवानिवृत्तीला अवघे सहा दिवस राहिले होते.
राजेंद्र हेले हे सेवानिवृत्त झाल्यावर पुन्हा भिवंडीचे अजय साबळे यांच्याकडे प्रभारी पदभार सोपवण्यात आला. आता पुन्हा साबळे यांना भिवंडीमध्ये पाठवण्यात आले आणि त्यांच्या जागी सं. ह. साकुरे यांची नियुक्ती करण्यात आली. आता साकुरे यांच्या जागी पालि केतील नगररचनाकार विकास बिरारी यांच्याकडे नगररचना सहाय्यक संचालकपदाचा अतिरिक्त कार्यभार सोपवण्यात आला आहे. मात्र या अदला-बदलीच्या खेळात महसूल वसुलीवर परिणाम होऊ लागला आहे.
नगररचना सहाय्यक संचालक या पदासाठी कायमस्वरूपी अधिकारी पाठवण्याची मागणी महाराष्ट्र शासनाकडे करण्यात आली आहे. तसेच सध्या बांधकाम परवाने, अनधिकृत बांधकामे नियमितपणे करण्याच्या कामाला गती देऊन महसूलवाढीसाठी प्रयत्न करण्याचे आदेश संबंधित अधिकाऱ्यांना दिले आहेत.
– मनीषा आव्हाळे, पालिका आयुक्त
