बिहारमधील सासाराममध्ये रामनवमीदरम्यान जातीय हिंसाचार उसळला होता. यात अनेक जण जखमी झाले होते. या प्रकरणी पोलिसांनी आता मोठी कारवाई करत भारतीय जनता पक्षाच्या माजी आमदाराला अटक केली आहे. रामनवमीला झालेल्या हिंसाचारात हात असल्याचा आरोप त्यांच्यावर आहे.
सासाराम जिल्ह्यात 31 मार्चला दोन गटात झालेल्या वादानंतर या ठिकाणी दगडफेक आणि वाहनांची तोडफोड करण्यात आली होता. तसेच अज्ञातांकडून करण्यात आलेल्या गोळीबारात दोन पोलीसही जखमी झाले होते. त्यामुळे परिसरात तणावाचे वातावरण निर्माण झाले होते. या हिंसाचारप्रकरणी पोलिसांनी भाजपचे माजी आमदार जवाहर प्रसाद ( Former BJP MLA Jawahar Prasad) यांच्यासह आणखी एकाला अटक केली आहे. सासाराम येथील निवासस्थानातून त्यांना अटक करण्यात आल्याची माहिती ‘एएनआय’ या वृत्तसंस्थेने दिली असून एसपी विनात कुमार यांनीही या वृत्ताची पुष्टा केली आहे.
Bihar | Former BJP MLA Jawahar Prasad arrested from his residence in Sasaram in connection with the communal violence case which took place on March 31 pic.twitter.com/raR5MIkXIv
— ANI (@ANI) April 29, 2023
सासाराम हिंसाचारानंतर माजी आमदार जवाहर प्रसाद यांच्याविरोधात न्यायालयाने अजामीनपात्र वॉरंट जारी केले होते. त्यानंतर त्यांना अटक करण्यात आली. आतापर्यं या हिंसाचार प्रकरणी 65 जणांना अटक करण्यात आली असून 38 जणांविरुद्ध अजामीनपात्र वॉरंट जारी करण्यात आले आहे. त्यांच्या अटकेसाठी पोलिसांनी शोधमोहीम सुरू केली आहे.
शहांचा दौरा रद्द
दरम्यान, सासाराममध्ये झालेल्या हिंसाचारानंतर केंद्रीय गृहमंत्री अमित शहा यांचा दौराही रद्द करण्यात आला. हिंसाचार झालेल्या ठिकाणापासून दोन किलोमीटर अंतरावर आयोजित कार्यक्रमाला शहा उपस्थित राहणार होते. मात्र ऐनवेळी हा दौरा रद्द करण्यात आला.
