देशभरातील गिग आणि डिलिव्हरी वर्कर्सनी 31 डिसेंबर रोजी संपाची घोषणा केल्यानंतर अनेक कंपन्यांची धांदल उडाली. नववर्षाच्या पूर्वसंध्येला डिलिव्हरी सेवेत अडथळे निर्माण होण्याची शक्यता लक्षात घेता झोमॅटो आणि स्विगी या ऑनलाइन डिलिव्हरी कंपन्यांनी त्यांच्या गिग वर्कर्सच्या पेमेंट आणि इन्सेंटिव्हमध्ये वाढ केली.
झोमॅटो आणि स्विगी आता आपल्या डिलिव्हरी पार्टनर्सना अधिक इन्सेंटिव्ह देणार आहेत. सणासुदीच्या आणि जास्त मागणीच्या दिवसांत सर्व्हिसमध्ये व्यत्यय टाळण्यासाठी कंपन्यांचा हा नेहमीचा उपाय असल्याचे सांगितले जाते आहे.
तेलंगणा गिग ऍण्ड प्लॅटफॉर्म वर्कर्स युनियन (टीजीपीडब्ल्ययू) आणि इंडियन फेडरेशन ऑफ ऍप बेस्ड ट्रान्सपोर्ट वर्कर्स (आयएफएटी) यांनी 1.7 लाखांहून अधिक डिलिव्हरी कामगारांनी संपात सहभागी झाल्याचा दावा केला आहे. संघटनांच्या मते, कमी होत जाणारे उत्पन्न, सुरक्षिततेचे धोके आणि कठोर कामाच्या परिस्थितीमुळे देशभरात निदर्शने केली जात आहेत.
प्रति ऑर्डर 150 रुपयांची ऑफर
झोमॅटोने नवीन वर्षाच्या पूर्वसंध्येला 6 ते 12 वाजेपर्यंतच्या पीक अवर्समध्ये डिलिव्हरी पार्टनर्सना प्रति ऑर्डर 120 ते 150 रुपये पेमेंट ऑफर केले आहे. प्लॅटफॉर्मने ऑर्डरची संख्या आणि कामगार उपलब्धतेनुसार दिवसभरात 3,000 रुपयांपर्यंत कमाईचे आश्वासन दिले आहे.
झोमॅटोने ऑर्डर नाकारणे आणि रद्द करणे यासाठी लागणारा दंड तात्पुरता माफ केलाय. झोमॅटोची मूळ कंपनी, एटरनलच्या प्रवक्त्याने स्पष्ट केले की, हा उच्च-मागणी असलेल्या सणांमध्ये आणि वर्षाच्या अखेरीस पाळला जाणारा स्टँडर्ड ऑपरेटिंग प्रोटोकॉल आहे.
दोन दिवसांत हजारोंची कमाई
झोमॅटोप्रमाणेच स्विगीनेही वर्षाच्या अखेरीस इन्सेंटीव्हज वाढवली आहेत. 31 डिसेंबर ते 1 जानेवारीदरम्यान डिलिव्हरी कामगारांना 10,000 रुपयांपर्यंतच्या कमाईची ऑफर दिली आहे, नवीन वर्षाच्या सायंकाळी 6 ते 12 रात्री या सहा तासांच्या कालावधीसाठी पीक-अवरमध्ये 2 हजार रुपयांपर्यंतची कमाई वाढवत आहे, जेणेकरून वर्षातील सर्वात व्यस्त ऑर्डरिंग काळात पुरेसे संख्येने रायडर्स उपलब्ध होतील.
