घाटकोपर-मानखुर्द लिंक रोड येथील लोटस सिग्नलजवळ एका भरधाव डंपरने तरुणाला चिरडल्याची घटना घडली. या दुर्घटनेत गंभीर जखमी झालेल्या तरुणाचा जागीच मृत्यू झाला. याप्रकरणी देवनार पोलिसांनी अज्ञात डंपर चालकाविरोधात सदोष मनुष्यवधाचा गुन्हा दाखल केला आहे. सादिक सय्यद असे मृत तरुणाचे नाव आहे. लोटस सिग्नलजवळ त्याला वेगात आलेल्या डम्परने धडक दिली. यामुळे सादिक ट्रकच्या चाकाखाली आला. अपघात झाल्यानंतर डंपर चालकाने तेथून पळ काढला. जखमी सादिकला नागरिकांनी लगेच राजावाडी इस्पितळात नेले. मात्र तेथे डॉक्टरांनी त्याला तपासून मृत घोषित केले.
