सामना प्रतिनिधी । परभणी
कृषी पदवी अभ्यासक्रमाच्या तृतीय वर्षात शिकत असलेल्या विद्यार्थ्याने वसतिगृहाच्या खोलीत छताच्या पंख्याला गळफास घेवून आत्महत्या केल्याची घटना आज मंगळवार, 11 डिसेंबर रोजी रात्री 9.45 वाजण्याच्या सुमारास घडली. वसंतराव नाईक मराठवाडा कृषी विद्यापीठातील ग्रीष्म मुलांच्या वसतिगृहातील (खोली क्र. 66) मध्ये ही घटना घडली. याबाबत पोलीसांत आकस्मात मृत्यूची नोंद झाली आहे.
याप्रकरणी गणेश हनुमंत कापासार याने नवा मोंढा पोलीस ठाण्यात फिर्याद दाखल केली. या फिर्यादीत सचिन पंडीतराव मुंडे (20 वर्षे, रा. सावरगाव मुंडे, ता.लोणार, जि.बुलडाणा) असे आत्महत्या केलेल्या मुलाचे नाव आहे. 11 डिसेंबर रोजी रात्री 9.45 वाजता वसतिगृहात तो राहत असलेल्या खोली क्रमांक 66 मध्ये सचिन छताच्या पंख्याला लटकलेल्या स्थितीत आढळून आल्याचे खोलीत राहणाऱ्या गणेश हनुमंत कापावार याने सांगितले. इतर मुलांच्या मदतीने त्यास खाली उतरवून रुग्णालयात उपचारासाठी दाखल करण्यात आले. परंतु डॉक्टरांनी त्यास मृत घोषीत केले. दरम्यान, या घटनेची माहिती गणेश कापावार याने नवामोंढा पोलीस ठाण्यात दिली. ही माहिती मिळताच पोलीसांनी घटनास्थळी जाऊन पाहणी केली. याप्रकरणी नवामोंढा पोलीस ठाण्यात आकस्मात मृत्यूची नोंद करण्यात आली आहे. परभणी येथील कृषी महाविद्यालयात सचिन मुंडे हा बी.एस्सी. कृषी तृतीय वर्षात शिक्षण होता. पदवीच्या सलग तिन्ही सेमीस्टरमध्ये तो नापास झाला होता. परंतु याची कल्पना त्याने कुटूंबियांना दिली नव्हती. शिवाय शुल्क भरण्यासाठी कुटुंबियांकडून घेतलेले पैसेही त्याने खर्च करुन टाकले. त्यामुळे त्यास शुल्क भरण्याकरीता पैसे नव्हते. शुल्क भरण्याची मुदतही संपली असल्याने तो मानसिक तणावात आला असावा. घरचे काय म्हणतील आणि शुल्क कसे भरणार या तणावात असलेला सचिन वसतिगृहात राहण्यासही पात्र ठरणार नव्हता अशी माहिती आहे. त्यामुळे अधिकच तणावात येवून त्याने गळफास घेतला असावा असे पोलीसांचे म्हणणे आहे. या प्रकरणाचा पुढील तपास पोलीस निरीक्षक नरसिंग ठाकूर यांच्या मार्गदर्शनाखाली सहाय्यक पोलीस निरीक्षक राजेश मल्लपिल्लू हे करीत आहेत.
