घरी पाहुणे येणार म्हटल्यावर गोडा धोडाचे पदार्थ करणं हे ओघानं येतंच. परंतु घाईच्या वेळी काय करायचं असा प्रश्न पडला असेल तर, ब्रेडचे हे साधे सोपे आणि चवीला उत्कृष्ट लागणारे गुलाबजाम नक्की करुन बघा. हे गुलाबजाम दिसायला जितके सुंदर दिसतात त्यापेक्षा जास्त चवीला उत्तम लागतील असेच आहेत. त्यामुळे आता घाईच्या वेळी पटकन एक ब्रेड घेऊन या आणि झटपट हे ब्रेडचे गुलाबजाम बनवून बघा. घरातील सर्वांना तर आवडतीलच, पाहुणेही खाऊन तुमचं कौतुक करतील हे नक्की..
ब्रेड गुलाबजाम
साहित्य
10 तुकडे ब्रेड
2 कप दूध
2 चमचा वेलची पावडर
2 वेलची
2 कप पाणी
2 कप साखर
गरजेनुसार तूप किंवा तेल
कृती
सर्वात आधी ब्रेडच्या कडा नीट कापून घ्या. ब्रेडला अजिबात कडा राहता कामा नये.
कडा काढून झालेला ब्रेड हा दुधात भिजवून ठेवा. किमान दहा ते पंधरा मिनिटे हा ब्रेड दुधात भिजवून ठेवावा.
हा ब्रेड दुधात भिजल्यानंतर यामध्ये थोडेसे तेल वेलची पावडर घालून मळून घ्यावा. ब्रेड मळताना तो अतिशय हलक्या हाताने मळून घ्या.
ब्रेड मळाल तेव्हा हे लक्षात असू द्या की, ब्रेडचे केलेले मिश्रण हे फार कडक किंवा फार मऊ नसावे.
ब्रेडचे हे मिश्रण किमान 10 मिनिटे झाकून ठेवावे.
त्यानंतर याचे गुलाबजामच्या आकाराचे गोळे करुन घ्यावे.
पॅनमध्ये तूप किंवा तेल गरम करुन, त्यात दोन्ही बाजूंनी लाल होईपर्यंत गोळे तळून घ्यावेत.
दुसऱ्या एका पॅनमध्ये साखर आणि पाणी घालून एक सिरप बनवावे. त्यात वेलची आणि केशराच्या दांड्या घालाव्यात. म्हणजे साखरेच्या पाकाला चांगला सुगंध येईल. केशराने साखरेच्या पाकाला मस्त रंगही येतो.
साखरेचा पाक किंचित थंड झाल्यानंतर त्यात गुलाबजाम सोडावेत. त्यानंतर गुलाबजाम मुरल्यानंतर बाहेर काढून ठेवावे.
