वैद्यकीय महाविद्यालयात सहाय्यक प्राध्यापक पदाच्या नोकरीच्या नावाखाली शिक्षिकेची फसवणूक झाल्याची घटना घडली आहे. या प्रकरणी डी. एन. नगर पोलिसांनी गुन्हा नोंद करून तपास सुरू केला आहे. तक्रारदार या शिक्षिका आहेत. मे महिन्यात त्यांनी नोकरीसाठी ऑनलाइन सर्च केले होते. तेव्हा त्यांनी एका वांद्रे येथील महाविद्यालयात सहाय्यक प्राध्यापक नोकरीसाठी अर्ज केला. त्यानंतर सात दिवसांनी त्यांना एका नंबरवरून फोन आला. फोन करणाऱ्याने आपण महाविद्यालयातून बोलत असल्याचे सांगत महिलेला 76 हजार रुपये पाठवण्यास सांगितले. नोकरी मिळणार असल्याने त्यांनी पैसे पाठवले. पैसे पाठवल्यानंतर त्यांनी त्या कॉलेजमध्ये जाऊन चौकशी केली तेव्हा फसवणुकीचा प्रकार त्यांच्या लक्षात आला.
