
उत्तराखंड विधानसभा निवडणुकीचे निकाल हाती आल्यानंतर आता उत्तराखंड काँग्रेसमध्ये फूट पडण्याची शक्यता वर्तवली जात आहे. यामुळे उत्तराखंडच्या राजकारणात खळबळ माजली असून तेथील राजकारण तापू लागले आहे. राज्यात भारतीय जनता पक्षाने विधानसभेत 70 पैकी 47 जागा जिंकल्या. त्याचवेळी काँग्रेसच्या वाट्याला 19 जागा आल्या. बहुजन समाज पक्षाने येथे 2 जागा जिंकल्या तर अपक्ष उमेदवारांनी 2 जागा जिंकल्या. या निवडणुकीतील सर्वात महत्त्वाची गोष्ट म्हणजे भाजपचे मुख्यमंत्री पदाचे उमेदवार पुष्कर सिंह धामी आणि काँग्रेसचे माजी मुख्यमंत्री हरीश रावत यांचा निवडणुकीत पराभव झाला. मात्र, भाजपने पुन्हा एकदा पुष्कर सिंह धामी यांना मुख्यमंत्री केले आहे.
पुष्कर सिंह धामी यांच्यासोबत काँग्रेसच्या काही वरिष्ठ नेत्यांची भेट झाल्याची चर्चा आहे. काँग्रेस आमदाराचा राजीनामा घेऊन भाजप पुष्कर सिंह धामी यांना पुन्हा एकदा निवडणुकीच्या रिंगणात उतरवण्याच्या तयारीत असल्याचे मानले जात आहे. धामी यांचा विधानसभा निवडणुकीत खटीमा येथून पराभव झाला होता.
आता काँग्रेसचे 10 आमदार भाजपमध्ये प्रवेश करण्याच्या तयारीत असल्याच्या बातम्या येत आहेत. रविवारी काँग्रेस हायकमांडने प्रदेशाध्यक्ष, विरोधी पक्षनेते आणि विरोधी पक्ष उपनेते यांच्या नावांची घोषणा केली होती. भाजप सरकारमध्ये कॅबिनेट मंत्री राहिलेले व निवडणुकीपूर्वी काँग्रेसमध्ये गेलेले यशपाल आर्य यांना विरोधी पक्षनेते करण्यात आले होते. त्याचवेळी राणीखेत विधानसभेतून पराभूत झालेले करण महरा यांच्याकडे प्रदेशाध्यक्षपदाची जबाबदारी देण्यात आली.
नेतृत्व बदलामुळे नाराजी वाढली
प्रदेश नेतृत्वातील फेरबदलामुळे काँग्रेसचे अनेक बडे नेते नाराज आहेत. यातील अनेक आमदार भाजपच्या संपर्कात असल्याचे सांगण्यात येत आहे. भाजप या आमदारांना पक्षात सामावून घेऊ शकते अशीही चर्चा आहे. राज्यात 2016 प्रमाणेच पक्षांतर होण्याची चिन्हे आहेत. काँग्रेसचे आठ आमदार भाजपच्या संपर्कात असल्याने ते लवकरच भाजपमध्ये प्रवेश करू शकतात असे बोलले जात आहे. त्यापैकी 5 आमदार कुमाऊंमधून आणि 3 गढवालमधून असल्याचे सांगण्यात येत आहे. त्यामुळे काँग्रेसमध्ये मोठी बंडखोरी होणार आहे.
विरोधी पक्षनेते आणि सभापतींवर नेते नाराज
यशपाल आर्य हे विरोधी पक्षनेते आणि करण महरा प्रदेशाध्यक्ष झाल्याने अनेक नेते नाराज झाल्याचे वृत्त आहे. ही नाराजीच काँग्रेसमध्ये मोठी फूट पडण्याचे कारण ठरू शकते. काँग्रेसचे 10 आमदार उद्या डेहराडूनमध्ये गुप्त बैठक घेणार आहेत. या बैठकीला आमदार हरीश धामी, मनोज तिवारी, मदन बिश्त, मयुख मेहर, खुशाल सिंह अधिकारी, ममता राकेश, विक्रम नेगी, राजेंद्र भंडारी उपस्थित राहू शकतात. काँग्रेसचे दुर्लक्ष होत असल्यामुळे संतापलेले काही आमदार लवकरच काँग्रेस सोडून भाजपमध्ये प्रवेश करणार असल्याची चर्चा आहे.




























































