तमिळ अभिनेता विजय याच्या घरी आयकर विभागाने छापेमारी केल्याचे वृत्त ANI या वृत्तसंस्थेने दिले आहे. या वृत्तसंस्थेने दिलेल्या माहितीमध्ये म्हटले आहे की तमिळनाडूमध्ये आयकर विभागाने अभिनेता विजय आणि निर्माता अबू चेलियन यांच्या मालकीच्या घर आणि कार्यालयांवर धाड टाकली आहे. या जागांची संख्या 38 च्या घरात असून आतापर्यंतच्या छापेमारीमध्ये 65 कोटी रुपये हस्तगत करण्यात आले आहे.
Tamil Nadu: Income Tax Department is conducting raids & surveys at the properties of Tamil actor Vijay and producer Anbu Chezhiyan. Around 38 premises have been covered in the raid and Rs 65 crores have been recovered. pic.twitter.com/zrz63CcBoO
— ANI (@ANI) February 6, 2020
विजयची बुधवारी आयकर विभागाच्या अधिकाऱ्यांनी कसून चौकशी केली होती. विजयने कर चुकवेगिरी केल्याचा आयकर विभागाच्या अधिकाऱ्यांना संशय आहे. यामुळे ही चौकशी करण्यात आल्याचं सांगण्यात आलं आहे. चौकशीसाठी अधिकारी जेव्हा पोहोचले तेव्हा वजय चित्रीकरणात व्यस्त होता. या चौकशीमुळे हे चित्रीकरण बराचवेळ थांबवण्यात आलं होतं.
एजीएस सिनेमा आणि निर्माते अंबू चेलियन हे आयकर विभागाच्या रडारवर आहेत. एजीएस सिनेमा कंपनीने विजयची मुख्य भूमिका असलेल्या ‘बिजिल’ या चित्रपटाची निर्मिती केली होती. हा चित्रपट तुफान हिट झाला असून त्याने 300 कोटींपेक्षा अधिकची कमाई केली आहे. तमिळ चित्रपटसृष्टीतील सर्वाधिक यशस्वी चित्रपटांच्या यादीत या चित्रपटाने स्थान मिळवले आहे. 180 कोटी रुपयांमध्ये तयार करण्यात आलेल्या या चित्रपटाने कमाईचे नवे रेकॉर्ड प्रस्थापित केले होते. या चित्रपटात विजयची दुहेरी भूमिका होती आणि त्याच्यासोबत नयनतारा, जॅकी श्रॉफ यांच्याही महत्वाच्या भूमिका होत्या.
