राजधानी दिल्लीमध्ये थंडीचा पारा आणखीनच घसरला आहे. दिल्लीमध्ये शनिवारी पहाटे किमान तापमानाची विक्रमी नोंद झाली आहे.
शनिवारी पहाटे दिल्लीमध्ये तापमान 2.4 डिग्री सेल्सियस इतकं नोंदवण्यात आलं आहे. गेल्या 14 दिवसांपासून दिल्लीतील तापमान सलग घसरत असून येत्या काही दिवसात पारा आणखी घसरण्याची शक्यता आहे.
अवघ्या तीन दिवसांपूर्वी म्हणजे बुधवारी सकाळी दिल्लीमध्ये 5.4 अंश तापमानाची नोंद करण्यात आली होती. म्हणजेच तीन दिवसांत पारा तब्बल 3 अंशांनी घसरला आहे.
गेल्या 22 वर्षामध्ये डिसेंबर महिन्यात पहिल्यांदाच राजधानीमध्ये सलग 14 दिवस एवढ्या निचांकी तापमानाची नोंद झाली आहे.
याआधी 1997 मध्ये सलग 13 दिवस दिल्लीकरांना कुडकुडत काढावे लागले होते. 2019 मध्ये हा विक्रम मोडला असून यंदा सलग 14 दिवस दिल्लीकरांना कडाक्याच्या थंडीचा सामना करावा लागत आहे.
पाच वर्षांपूर्वी म्हणजेट 2014 साली थंडीचा कहर सलग 8 दिवस सहन करावा लागला होता.
दिल्लीसह नोएडा, गाझियाबाद, फरीदाबाद आणि गुरुग्राम इथे थंडीमुळे जनजीवन गारठले आहे. थंडीसोबत दाट धुकेही पडत असल्याने याचा परिणाम रेल्वे आणि हवाई वाहतुकीवर होण्याची दाट शक्यता आहे.
