राज्य शासनाच्या सार्वजनिक आरोग्य विभागाच्या अधिपत्याखाली असलेली राज्यातील सर्व सिव्हील रुग्णालये, मनोरुग्णालये आणि विमा योजना रुग्णालयांतील चतुर्थश्रेणी कर्मचारी वर्षानुवर्षे प्रलंबित मागण्यांसाठी आज सर्व कर्मचाऱ्यांनी काळ्या फिती लावून आंदोलन केले. दरम्यान, 7 मे रोजी आझाद मैदानात धरणे आंदोलनही पुकारण्यात येणार आहे.
रुग्णालये आणि विभागातील वर्ग ‘ड’ची सर्व रिक्त पदे सरळसेवेने तत्काळ भरून सध्या सुरू असलेले खासगीकरण आणि कंत्राटीकरण धोरण रद्द करावे. मनोरुग्णालयातील निरसित केलेली वर्ग-4 ची पदे पुनर्जीवित करावीत. राज्य कामगार विमा योजनेअंतर्गत गट ड पदांसाठी तत्काळ नवीन सेवाप्रवेश नियम तयार करावेत, अशा अनेक मागण्या आहेत. चतुर्थश्रेणी कर्मचारी मध्यवर्ती महासंघाचे राज्याध्यक्ष भाऊसाहेब पठाण, सरचिटणीस बाबाराव कदम, कार्यालय प्रमुख मनोहर दिवेकर, तसेच राज्य सरकारी चतुर्थश्रेणी कर्मचारी मध्यवर्ती संघटनेचे अध्यक्ष भगवान शिंदे, सरचिटणीस बाळाराम सावर्डेकर, उपाध्यक्ष विजय सुरवसे यांनी आंदोलनात सहभाग घेतला.
