अमेरिकेची द्वितीय मानांकित टेनिसपटू कोको गॉफ हिने फ्रेंच ओपन टेनिस स्पर्धेतील महिला एकेरीचे विजेतेपद पटकावले आहे. निर्णयाक लढतीमध्ये तिने बेलारूसच्या अव्वल मानांकित अरिना सबालेन्काला हिचा 6-7(5), 6-2, 6-4 असा पराभव केला. तीन वर्षांपूर्वी तिला उपविजेतेपदावर समाधान मानावे लागले होते, मात्र यंदा तिने आपल्या खेळात सुधारणा करत थेट जेतेपदाला गवसणी घातली. तिचे हे दुसरे ग्रँड स्लॅम आहे. याआधी तिने 2023 मध्ये अमेरिकन ओपन स्पर्धेवर नाव कोरले होते.
NEW QUEEN OF PARIS 👑#RolandGarros pic.twitter.com/eiesv9t1Aw
— Roland-Garros (@rolandgarros) June 7, 2025
अंतिम लढतीमध्ये बेलारूसची अरिना सबालेन्काला हिचे पारडे थोडे जड होते. तिने सुरुवातही चांगली केली. कोकोवर पहिल्या सेटमध्ये प्रचंड दबाव दिसला. यामुळे तिच्याकडून काही चुकाही झाल्या. याचा फायदा उठवत सबालेन्काला हिने पहिला सेट आपल्या नावावर केला.
दुसऱ्या सेटमध्ये मात्र 21 वर्षीय कोको गॉफ हिने दमदार पुनरागमन करत सबालेन्काला हिची सर्व्हिस ब्रेक केली. त्यानंतर सेबालेन्काला हिने एकामागोमाग एक चुका केल्या आणि याचा फायदा उठवत कोकोने दुसरा सेट 6-2 असा जिंकत लढत 1-1 अशी बरोबरीत आणली. त्यानंतर तिसरा सेटही जिंकत कोकोना विजेतेपदावर मोहोर उमटवली. हा सामना 2 तास 38 मिनिटे रंगला.
विजेतेपद मिळवल्यानंतर कोको गॉफ म्हणाली की, ही स्पर्धा जिंकू शकेन असे मला वाटत नव्हते. या यशाचे श्रेय माझ्या सहकाऱ्यांचे असून त्याने मला माझा सर्वोत्तम खेळ खेळण्यास प्रोत्साहित केले. कुटुंबियांचा विश्वासही मोलाचा ठरला. तीन वर्षांपूर्वी इथेच माझा पराभव झाला होता, यावेळी मी त्यावर मात करू शकले.
