इस्रायलने इराणला पूर्ण बेचिराख करण्याच्या उद्देशाने सलग तिसऱया दिवशी हवाई हल्ले केले. इराणविरोधातील युद्धात इस्रायलने अमेरिकेलाही सामील करून घेण्याचा प्रयत्न केला. त्यानुसार इस्रायलचे पंतप्रधान बेंजामिन नेत्यानाहू यांनी तसा प्रस्ताव अमेरिकेपुढे ठेवला, मात्र युद्धात आम्ही पडणार नसल्याचे स्पष्ट करुन अमेरिकेने नेत्यानाहू यांचा प्रस्ताव नाकारला आहे. ‘टाइम्स ऑफ इस्रायल’ने यासंदर्भात वृत्त दिले आहे.
इराणचा अणु कार्यक्रम संपवण्यासाठी इस्रायलने मागील दोन दिवस ट्रम्प प्रशासनाला युद्धात सामील होण्याची विनंती केली. यासंदर्भात नेत्यानाहू यांनी सादर केलेला प्रस्ताव ट्रम्प प्रशासनाने नाकारल्याची माहिती इस्रायलच्या वरिष्ठ अधिकाऱयांनी दिली आहे. अमेरिकेने अणुकरारासाठी इराणला साठ दिवसांचा अल्टिमेटम दिला होता. इतकेच नव्हे तर अणुकरार केला नाही तर भयंकर हल्ले करू, अशी धमकी दिली होती. त्यामुळे इस्रायलकडून इराणवर सुरू असलेल्या हल्ल्यांना अमेरिकेचा पाठिंबा असल्याचे बोलले जात होते, मात्र अमेरिकेने इस्रायलच्या इराणविरोधातील कारवाईपासून स्वतःला दूर ठेवले आहे. युद्धात आम्ही पडणार नाही, असे स्पष्ट करुन इस्रायलचा युद्धात सामील होण्याचा प्रस्ताव अमेरिकेने धुडकावला आहे. इराणने अमेरिकेच्या टार्गेटवर हल्ला करून प्रत्युत्तर देणे बेकायदेशीर ठरेल, असे कारण ट्रम्प प्रशासनाने दिले आहे. ट्रम्प प्रशासन सध्यातरी इराणविरोधातील युद्धात सामील होण्याचा विचार करीत नाही. इराणवर हल्ला करण्याची ही वेळ नाही, असे अमेरिकेच्या अधिकाऱयांनी म्हटले आहे.
हिंदुस्थान-पाकिस्तानमध्ये
मी डील घडवले, तसे हे युद्धही मीच थांबवणार!
नुकताच हिंदुस्थान-पाकिस्तान या देशांतही मी युद्धविरामाचे डील घडवून आणले. तसाच इराण आणि इस्रायलमधील वॉरही मी थांबवणार, असे अमेरिकेचे राष्ट्राध्यक्ष डोनाल्ड ट्रम्प म्हणाले. सध्या फोन कॉल आणि बैठका सुरू आहेत, असे ट्रम्प यांनी नमूद केले.
