जम्मू-कश्मीरमधील पहलगाम येथे 22 एप्रिल 2025 रोजी झालेल्या दहशतवादी हल्ल्याच्या तपासात राष्ट्रीय तपास यंत्रणेने (NIA) मोठा खुलासा केला आहे. एनआयएने म्हटले आहे की, हल्ला करणारे तीन दहशतवादी पाकिस्तानचे रहिवासी होते आणि ते लष्कर-ए-तोयबाशी संबंधित होते.
परवेझ अहमद जोथर आणि बशीर अहमद जोथर या दोन कश्मिरी नागरिकांच्या अटकेनंतर हे उघड झाले आहे. दोघांवरही हल्लेखोरांना त्यांच्या घरात राहण्याची व्यवस्था, जेवण आणि इतर सुविधा पुरवल्याचा आरोप आहे.
हल्ल्यातील संशयितांचे स्केचे चुकीचे?
याआधी बोललं जात होत की, हा हल्ला पाकिस्तानातील दोन आणि काश्मीरमधील एकाने केला होता. यातच पहलगाम येथील हल्ल्यानंतर जम्मू आणि कश्मीर पोलिसांनी हल्ल्यातील तीन संशयितांचे स्केचही जारी केले आहेत. मात्र हे स्केच चुकीचे चुकीचे होते, अशी माहिती आता समोर आली आहे. ‘इंडियन एक्स्प्रेस’ने एनआयएच्या सूत्रांच्या हवाल्याने वृत्त दिलं की, जम्मू आणि कश्मीर पोलिसांनी पहलगाम हल्ल्यातील संशयितांचे तीन स्केचे जारी केले होते. मात्र हे स्केच हल्लेखोरांचे नाहीत. दरम्यान, ही माहिती समोर आल्यानंतर देशभरात संताप व्यक्त करण्यात येत आहे.
