इराण आणि इस्रायल यांच्यात शस्त्रसंधी झाल्याने जगावरील महायुद्धाचे सावट दूर झाले आहे. मात्र, अमेरिकेने केलेल्या एका दाव्यामुळे जगाची चिंता वाढली आहे. या युद्धाच्या कालावधीत इराणमधून 400 किलो युरेनियम गायब झाले आहे. एवढ्या युरोनियमद्वारे सुमारे 10 अणुबॉम्ब बनवण्यात येऊ शकतात. अमेरिकेच्या या द्वायमुळे जगाला नवा धोका निर्माण झाला आहे.
इराणमधून गायब झालेला 400 किलो युरेनियमचा साठा 10 अणुबॉम्ब बनवण्यासाठी पुरेसा आहे, असे अमेरिकेचे उपाध्यक्ष जेडी व्हान्स यांनी सांगितले आहे. अमेरिकेने इराणच्या तीन अण्वस्त्र केंद्रावर बंकर बस्टरने हल्ला चढवल्यानंतर 400 किलो युरेनियम गायब झाल्याचे सांगण्यात आले. गायब झालेले युरेनियम 60 टक्क्यांपर्यंत समृद्ध केले होते. तर अण्वस्त्र बनवण्यासाठी युरेनियम 90 टक्क्यांपर्यंत समृद्ध करणे आवश्यक असते. त्यामुळए गायब झालेले युरेनियम जगासाठी मोठा धोका ठरू शकते.
हल्ल्याच्या काही दिवस आधी इराणने हा साठा आणि महत्त्वाची उपकरणे गुप्त ठिकाणी स्थलांतरीत केली असतील, असा दावा इस्रायली अधिकाऱ्यांनी केला आहे. अमेरिकेच्या हल्ल्यापूर्वीच्या उपग्रह प्रतिमांमध्ये फोर्डो अणुऊर्जा प्रकल्पाबाहेर 16 ट्रकची रांग दिसून आली. मात्र, हल्ल्यानंतरच्या प्रतिमांमध्ये तिन्ही ठिकाणी लक्षणीय नुकसान दिसून आले परंतु ट्रक गायब झाले होते. त्यातूनच युरेनियम गुप्त ठिकाणी नेण्यात आल्याची शक्यता वर्तवण्यात येत आहे. ते कुठे हलवण्यात आले हे स्पष्ट नसले तरी अमेरिका आणि इस्रायलचा ठाम विश्वास आहे की ते इस्फहानजवळील दुसऱ्या भूमिगत साठवण सुविधेत हलवण्यात आले असतील. त्यामुळे आता शस्त्रसंधी झाली असली तरी गायब झालेल्या युरेनियममुळे जगाचा धोका वाढला आहे.
