सिंहगड रस्त्यावरील शिवा काशीद चौक ते हिंगणे दरम्यानचा स्वारगेटच्या दिशेने जाणाऱ्या उड्डाणपुलाचे मुख्यमंत्री देवेंद्र फडणवीस यांच्या हस्ते अखेर उद्घाटन झाले. काम पूर्ण होऊनही मुख्यमंत्र्यांची वेळ मिळत नसल्याने उद्घाटन थांबवले होते. मुख्यमंत्री आले अन् फीत कापून गेले. उद्घाटनाच्या दिवशीदेखील मुख्यमंत्र्यांच्या दौऱ्यामुळे सिंहगड रस्त्यावर वाहतूककोंडी झाली. पूर्वी राजाराम पूल ते फनटाइम थिएटर या 2.6 किमी अंतरावरील सहा चौक पार करण्यासाठी सुमारे 30 मिनिटांचा कालावधी लागत होता. नव्या उड्डाणपुलामुळे हा वेळ आता केवळ 5 ते 7 मिनिटांवर आला आहे. या उड्डाणपुलामुळे सिंहगड रस्त्यावरील वाहतूक कोंडीतून नागरिकांना दिलासा मिळण्याची शक्यता आहे.
