मध्य रेल्वेच्या मेन आणि हार्बर लाइनवर रविवारी मेगाब्लॉक असणार आहे. माटुंगा ते मुलुंड स्थानकांदरम्यान अप-डाऊन जलद मार्गावर सकाळी 11.05 ते दुपारी 3.45 वाजेपर्यंत मेगाब्लॉक राहील. ब्लॉक काळात दोन्ही स्थानकांदरम्यान अप-डाऊन जलद लोकल धिम्या मार्गावरून धावणार आहेत. तसेच हार्बरवर वाशी ते नेरुळ आणि ठाणेदरम्यान सकाळी 11.10 ते दुपारी 4.10 वाजेपर्यंत सेवा बंद राहणार आहे.
छत्रपती शिवाजी महाराज टर्मिनस येथून सकाळी 10.36 ते दुपारी 3.10 वाजेपर्यंत सुटणाऱ्या डाऊन जलद मार्गावरील गाडय़ा माटुंगा स्थानकात डाऊन धिम्या मार्गावर वळविण्यात येतील. या गाडय़ा माटुंगा ते मुलुंडदरम्यान त्यांच्या निर्धारित थांब्यांवर थांबतील. ठाण्यापलीकडे जाणाऱ्या जलद गाडय़ा मुलुंड स्थानकात पुन्हा डाऊन जलद मार्गावर वळविण्यात येणार आहेत. तसेच ठाणे येथून सकाळी 11.03 ते दुपारी 3.38 वाजेपर्यंत सुटणाऱ्या अप जलद मार्गावरील गाडय़ा मुलुंड स्थानकात अप धिम्या मार्गावर वळविण्यात येतील. या गाडय़ा मुलुंड ते माटुंगादरम्यान त्यांच्या निर्धारित थांब्यांवर थांबतील आणि माटुंगा स्थानकात पुन्हा अप जलद मार्गावर वळविण्यात येतील.
पश्चिम रेल्वेवर आज रात्री ब्लॉक
पश्चिम रेल्वेवर वसई रोड ते भाईंदरदरम्यान शनिवारी मध्यरात्री ब्लॉक असेल. अप जलद मार्गावर रात्री 11.30 ते 3 वाजेपर्यंत आणि डाऊन जलद मार्गावर मध्यरात्री 1.15 ते पहाटे 4.45 पर्यंत ब्लॉक असेल.
हार्बरवर ठाणे ते वाशी/नेरुळदरम्यान सकाळी 11.10 ते दुपारी 4.10 वाजेपर्यंत ब्लॉक असेल. या अवधीत वाशी/नेरुळ आणि ठाणे स्थानकांदरम्यान रेल्वे सेवा बंद राहतील. ठाणे येथून सकाळी 10.35 ते दुपारी 4.07 वाजेपर्यंत सुटणाऱ्या आणि वाशी/नेरुळ/पनवेलकडे जाणाऱ्या डाऊन मार्गावरील गाडय़ा तसेच पनवेल/नेरुळ/वाशी येथून सकाळी 10.25 ते दुपारी 4.09 वाजेपर्यंत ठाण्याकडे येणाऱ्या अप मार्गावरील गाडय़ा रद्द राहतील.
