जम्मू आणि कश्मीर पोलिसांनी दहशतवाद्यांविरुद्ध मोठी कारवाई केली आहे. जैश-ए-मोहम्मद (जेईएम) आणि अन्सार गजवत-उल-हिंदशी (एजीयूएच) संबंधित एका आंतरराज्यीय आणि आंतरराष्ट्रीय दहशतवादी मॉड्यूलचा पर्दाफाश करण्यात सुरक्षा दलाला यश आले आहे. या कारवाईत दोन डॉक्टरांसह सात जणांना अटक करण्यात आली आहे. तसेच आतापर्यंत २,९०० किलोग्रॅम स्फोटके जप्त करण्यात आली आहेत
वृत्तसंस्थेच्या वृत्तानुसार, पोलिसांनी दहशतवाद्यांकडून मोठ्या प्रमाणात शस्त्रे, दारूगोळा आणि अंदाजे २,९०० किलोग्रॅम आयईडी ( स्फोटके बनवण्याचे साहित्य) जप्त केले आहे. ही कारवाई जम्मू-काश्मीर आणि फरिदाबाद पोलिसांनी संयुक्तपणे केली. हे नेटवर्क हिंदुस्थान आणि पाकिस्तानमधील अनेक राज्यांशी संबंधित हँडलर्सद्वारे चालवले जात होते. अटक केलेल्या आरोपींमध्ये फरिदाबादचे डॉक्टर मुअझम्मिल अहमद गनई आणि कुलगामचे रहिवासी डॉक्टर आदिल यांचा समावेश आहे. ते परदेशी हँडलर्सच्या संपर्कात होते आणि सामाजिक आणि शैक्षणिक नेटवर्कद्वारे निधी उभारत होते, असे तपासात उघड झाले आहे.
पोलिसांनी सांगितले की हे एक ‘व्हाइट कॉलर टेरर नेटवर्क’ होते ज्यामध्ये काही व्यावसायिक आणि विद्यार्थी दहशतवाद्यांशी संबंधित होते. ते एन्क्रिप्टेड चॅनेलद्वारे विचारसरणीचा प्रसार, निधीची हालचाल आणि शस्त्रास्त्रांचा पुरवठा यांचे समन्वय साधत होते. १९ ऑक्टोबर रोजी, श्रीनगरच्या बनपोरा नौगाम भागात जैश-ए-मोहम्मदचे पोस्टर्स आढळल्यानंतर गुन्हा दाखल करण्यात आला. तपासादरम्यान, पोलिसांना आढळून आले की हे नेटवर्क केवळ खोऱ्यातच नाही तर हरियाणा आणि उत्तर प्रदेशातही पसरले आहे.
अटक करण्यात आलेल्या सात जणांची ओळख पटली आहे ती म्हणजे आरिफ निसार दार उर्फ साहिल, यासिर-उल-अशरफ, मकसूद अहमद दार उर्फ शाहीद (सर्व श्रीनगरचे), मौलवी इरफान अहमद (शोपियां), जमीर अहमद अहंगर (गंदरबल), डॉ. मुअझम्मिल अहमद गनई (पुलवामा) आणि डॉ. आदिल (कुलगाम). डॉ. मुअझम्मिल यांना फरिदाबादमधील त्यांच्या भाड्याच्या घरात अटक करण्यात आली, जिथे पोलिसांनी ३६० किलो अमोनियम नायट्रेट, एके-५६ रायफल, एके क्रिन्कोव्ह रायफल, बेरेटा पिस्तूल, चायनीज स्टार पिस्तूल आणि शेकडो राउंड दारूगोळा जप्त केला. पोलिसांनी सांगितले की, नेटवर्कने समाजकल्याणाच्या नावाखाली निधी गोळा केला आणि दहशतवादी कारवायांसाठी त्यांचा वापर केला, असे पोलिसांनी सांगितले.
