वसन्त्यरण्येषु चरन्ति दुर्वां । पिबन्ति तोयान्यपरिग्रहाणि।
तथापि वध्या हरिणा नराणां । को लोकमाराधयितुं समर्थः?
वनातील हरिणे तर वनांत शांतपणे राहतात, कोवळे गवत खातात, स्वच्छ पाणी पितात, कोणाचं काही घेत नाहीत, कुणावर हक्क सांगत नाहीत तरीही मनुष्य त्यांना मारतो. या जगाला खूश ठेवणं कोणाला तरी शक्य आहे का? एक कटू व्यावहारिक सत्य येथे सांगितले आहे. तुम्ही निष्पाप आहात म्हणून किंवा तुम्ही कोणाला उपद्रव दिला नाही म्हणून जग तुम्हाला त्रास देणार नाही, अशी जर तुमची समजूत असेल तर ती साफ चुकीची आहे. यासाठीच हरणाचे उदाहरण देण्यात आले आहे. कोणाच्याही अध्यात मध्यात नसणाऱ्या निरागस हरणाचीही शिकार होतेच. जग निष्ठुर आणि क्रूर आहे हे कधीही विसरू नये.
निरागस असा पण भोळसट असू नका. तुम्ही पापभीरू असलात तरी स्वसंरक्षणासाठी प्रत्येकाने सिद्ध असावे.
डॉ. समिरा गुजर–जोशी
