हिंदुस्थानच्या रेल्वेने आजपासून (२६ डिसेंबर) लांब पल्ल्याच्या रेल्वे प्रवासाच्या तिकीट दरात वाढ केली आहे. रेल्वे मंत्रालयाने गेल्या सहा महिन्यांत दुसऱ्यांदा भाड्यात वाढ करण्याचा निर्णय घेतला आहे. प्रवाशांना परवडणारे दर आणि रेल्वेचे परिचालन शाश्वत ठेवणे, या उद्देशाने ही दरवाढ करण्यात आल्याचे मंत्रालयाने स्पष्ट केले आहे.
कुणाला फटका आणि कुणाला दिलासा?
उपनगरीय सेवा (Locals): मुंबई लोकलसारख्या उपनगरीय गाड्या आणि ‘सीझन तिकीट’ (पास) धारकांसाठी दरात कोणताही बदल करण्यात आलेला नाही.
जुनी बुकिंग: ज्या प्रवाशांनी २६ डिसेंबरपूर्वी तिकीट बुक केले आहे, त्यांना वाढीव दर लागू होणार नाहीत.
अशी असेल नवीन दरवाढ:
१. साधारण द्वितीय श्रेणी (Second Class Ordinary):
२१५ किमी पर्यंत: कोणतीही वाढ नाही.
२१६ ते ७५० किमी: ५ रुपयांची वाढ.
७५१ ते १२५० किमी: १० रुपयांची वाढ.
१२५१ ते १७५० किमी: १५ रुपयांची वाढ.
१७५१ ते २२५० किमी: २० रुपयांची वाढ.
२. स्लीपर आणि प्रथम श्रेणी (साधारण):
प्रति किलोमीटर १ पैशाने वाढ करण्यात आली आहे.
३. मेल आणि एक्सप्रेस गाड्या:
एसी (AC) आणि नॉन-एसी अशा सर्व श्रेणींसाठी प्रति किलोमीटर २ पैशांची वाढ झाली आहे. यामध्ये स्लीपर, एसी ३-टायर, एसी २-टायर, एसी फर्स्ट क्लास आणि चेअर कारचा समावेश आहे.
उदा. ५०० किमीच्या प्रवासासाठी आता साधारण १० रुपये अतिरिक्त द्यावे लागतील.
या गाड्यांच्या दरातही वाढ: वंदे भारत, राजधानी, शताब्दी, तेजस, दुरांतो, हमसफर, अमृत भारत, गतिमान आणि नमो भारत रॅपिड रेल यांसारख्या प्रमुख गाड्यांनाही ही नवीन दरवाढ लागू असेल.
आरक्षण शुल्क (Reservation Fee) आणि सुपरफास्ट सरचार्जमध्ये कोणताही बदल करण्यात आलेला नाही.
