छत्रपती शिवाजी महाराज टर्मिनस (सीएसएमटी) येथील प्लॅटफॉर्म क्र. 16 वरील काम सात महिन्यांनंतरही पूर्ण होऊ शकलेले नाही. या एका प्लॅटफॉर्मसाठी तब्बल पाचव्यांदा ब्लॉकची मुदत वाढवण्यात आली आहे. आता 5 सप्टेंबरपर्यंत ब्लॉक घेतला जाणार असल्याचे मध्य रेल्वे प्रशासनाने शुक्रवारी जाहीर केले. त्यामुळे तेजस एक्सप्रेस व इतर गाडय़ांच्या प्रवाशांचे आणखी 15 दिवस प्रचंड हाल होणार आहेत.
सीएसएमटीच्या पुनर्विकासाच्या नावाखाली रेल्वे जमीन विकास प्राधिकरणाने प्लॅटफॉर्मच्या विस्तारीकरणाचे काम हाती घेतले. यासाठी रेल्वेने पहिल्यांदा 1 फेब्रुवारी ते 26 एप्रिलदरम्यान ब्लॉक घेतला होता. आधी 19 मे, नंतर 13 जून, 5 ऑगस्ट, 21 ऑगस्ट आणि आता 5 सप्टेंबरपर्यंत मुदतवाढ दिली गेली आहे. गणेशोत्सवापूर्वी हा कामाचा खेळखंडोबा थांबणार की नाही, असा संतप्त सवाल प्रवाशांकडून केला जात आहे.
ब्लॉक अवधित हावडा-सीएसएमटी एक्सप्रेस, अमरावती-सीएसएमटी एक्सप्रेस आणि तेजस एक्सप्रेस या गाडय़ांचा प्रवास सीएसएमटीऐवजी दादर येथे समाप्त होणार आहे, तर मंगळुरू-सीएसएमटी एक्सप्रेस ही गाडी सीएसएमटीऐवजी ठाण्यापर्यंतच चालवण्यात येणार आहे.
