देवरुख येथील खालची आळी परिसरातील रहिवासी निखिल मिरजकर यांच्या घरी आज पहाटे ५ वाजण्याच्या सुमारास एका भलामोठ्या अजगराने दर्शन दिल्याने परिसरात एकच खळबळ उडाली. सुमारे ६ फूट लांबीच्या या अजगराने घरातील ‘फायटर’ कोंबड्याची शिकार केली होती.
घटनेची माहिती मिळताच ‘हेल्प फोर्स’ चे सर्परक्षक आर्य बेर्डे आणि ओम बेर्डे यांनी तात्काळ घटनास्थळी धाव घेतली. पहाटेच्या अंधारात आणि प्रतिकूल परिस्थितीत अत्यंत कौशल्याने व धैर्याने त्यांनी या ६ फुटी अजगराला सुरक्षितपणे पकडले.
सर्परक्षकांनी दाखवलेल्या प्रसंगावधान आणि धाडसाबद्दल मिरजकर कुटुंबियांसह परिसरातील नागरिकांनी आर्य व ओम बेर्डे यांचे मनापासून आभार मानले आहेत. पकडलेल्या अजगराला वनविभागाच्या सूचनेनुसार सुरक्षितपणे त्याच्या नैसर्गिक अधिवासात सोडण्यात येणार आहे.
