डेल्सी रॉड्रिग्ज यांनी व्हेनेझुएलामध्ये पदभार स्वीकारताच अमेरिकेचे अध्यक्ष डोनाल्ड ट्रम्प यांनी आणखी एक इशारा दिला आहे. त्यांनी स्पष्टपणे सांगितले आहे की, व्हेनेझुएलावर दुसरा हल्ला अजूनही शक्य आहे. त्यांनी पुढे म्हटले आहे की, आपण प्रथम व्हेनेझुएलाचा प्रश्न सोडवला पाहिजे आणि नंतर ग्रीनलँडचा विचार करू. दुसरीकडे, अमेरिकेच्या लष्करी कारवाईनंतर आणि राष्ट्राध्यक्ष निकोलस मादुरो आणि त्यांच्या पत्नीच्या अटकेनंतर, व्हेनेझुएलाच्या जनतेत अमेरिका आणि त्यांचे राष्ट्राध्यक्ष डोनाल्ड ट्रम्प यांच्याविरुद्ध संताप आहे.
रविवारी राजधानी कराकससह अनेक शहरांमध्ये लोक रस्त्यावर उतरून, अमेरिकेविरुद्ध आपला राग व्यक्त करत होते. दरम्यान सर्वोच्च न्यायालयाच्या आदेशानंतर, उपराष्ट्रपती डेल्सी रॉड्रिग्ज यांनी अमेरिकेला खुले आव्हान देत हंगामी अध्यक्ष म्हणून शपथ घेतली. शपथविधीनंतर राष्ट्राला उद्देशून केलेल्या भाषणात रॉड्रिग्ज म्हणाल्या की, व्हेनेझुएला पुन्हा कधीही कोणत्याही साम्राज्याची वसाहत होणार नाही. आपण गुलाम होण्यासाठी जन्माला आलो नाही. अमेरिकेला तेल किंवा सोने मिळणार नाही. मादुरो देशाचे अध्यक्ष होते आणि राहतील. पदभार स्वीकारल्यानंतर, अध्यक्ष डेल्सी रॉड्रिग्ज यांनी कठोर भूमिका घेतली आणि व्हेनेझुएला अमेरिकेच्या अटींवर काम करेल या राष्ट्राध्यक्ष ट्रम्पच्या दाव्याला नकार दिला आहे.
