जम्मू-कश्मीरमध्ये राजकीय घडामोडींना वेग आला आहे. आम आदमी पार्टीने ओमर अब्दुल्ला सरकारचा पाठिंबा काढला आहे. आपचे एकमेव आमदार आणि प्रदेशाध्यक्ष मेहराज मलिक यांनी शनिवारी एक्स (आधीचे ट्विटर) यावर पोस्ट करून याबाबत माहिती दिली.
कलम 370 हटवल्यानंतर 2024 पार पडलेल्या विधानसभा निवडणुकीमध्ये नॅशनल कॉन्फरन्सने स्पष्ट बहुमत मिळवले होते. 90 जागांसाठी झालेल्या निवडणुकीमध्ये नॅशनल कॉन्फरन्सने 42 जागा जिंकल्या होत्या. तर काँग्रेसने 6 जागांवर विजय मिळवला होता. नॅशनल कॉन्फरन्सला पाच अपक्ष आमदारांचाही पाठिंबा आहे. त्यामुळे आपने पाठिंबा काढला असला तरी अब्दुल्ला सरकारला कोणताही धोका नाही.
‘मी, डोडा मतदारसंघाचा आमदार मेघराज मलिक नॅशनल कॉन्फरन्स सरकारला दिलेला पाठिंबा मागे घेत आहे. जम्मू-कश्मीरच्या लोकांच्या हितासाठी हा निर्णय घेण्यात आला आहे. लोकांचा विश्वास आणि कल्याण याला नेहमीच माझे सर्वोच्च प्राधान्य असेल’, असे मेघराज मलिक यांनी एक्सवर केलेल्या पोस्टमध्ये म्हटले आहे.
I, Mehraj Malik, MLA from Doda, hereby withdraw my support to NC in the government coalition. This decision has been taken in the best interest of my people of Jammu and Kashmir whose trust and welfare will always be my top priority.
— Mehraj Malik (@MehrajMalikAAP) June 14, 2025
कोण आहेत मेघराज मलिक?
गेल्या वर्षी झालेल्या विधानसभा निवडणुकीमध्ये आम आदमी पार्टीने इतिहास रचत पहिल्यांदाच जम्मू-कश्मीरमध्ये खाते उघडले होते. आपचे उमेदवार मेघराज मलिक यांनी डोडा मतदारसंघातून भाजपच्या गजय सिंह राणा यांचा 4538 मतांनी पराभव केला होता. याच वर्षी जानेवारी महिन्यात त्यांच्याकडे प्रदेशाध्यक्षपदही सोपवण्यात आले होते.
