मध्य रेल्वेच्या प्रवाशांना उद्या रविवारी मेगाब्लॉकचा ताप सहन करावा लागणार आहे. ब्लॉक काळात माटुंगा ते मुलुंड स्थानकांदरम्यान सर्व लोकल धिम्या ट्रकवर चालवण्यात येणार आहेत. या दोन स्थानकांदरम्यान अप आणि डाऊन जलद मार्गावर सकाळी 11.05 ते दुपारी 3.45 वाजेपर्यंत ब्लॉक राहणार आहे.
छत्रपती शिवाजी महाराज टर्मिनस येथून सकाळी 10.36 वाजल्यापासून ते दुपारी 3.10 वाजेपर्यंत सुटणाऱ्या डाऊन जलद मार्गावरील गाड्या माटुंगा स्थानकात डाऊन धीम्या मार्गावर वळविण्यात येतील. ठाण्यापलीकडे जाणाऱ्या जलद गाड्या मुलुंड स्थानकात पुन्हा डाऊन जलद मार्गावर वळविण्यात येतील. ठाणे येथून सकाळी 11.03 वाजल्यापासून दुपारी 3.38 वाजेपर्यंत सुटणाऱ्या अप जलद मार्गावरील गाड्या मुलुंड स्थानकात अप धिम्या मार्गावर वळविण्यात येतील. हार्बर मार्गावर कुर्ला आणि वाशी स्थानकांदरम्यान अप व डाऊन हार्बर मार्गावर सकाळी 11.10 ते दुपारी 4.10 या वेळेत ब्लॉक राहील, असे मध्य रेल्वेने स्पष्ट केले.
