गुंतवणुकीचे दिवस

292

>> मिलिंद फणसे

आर्थिक वर्ष संपत आले आहे. नोकरदार वर्गासाठी आपल्या कष्टाचे पैसे कर म्हणून कापून घेणे परवडणारेच नसते. अशावेळी योग्य जागी केलेली गुंतवणूक कामी येते. पाहूया गुंतवणुकीचे पर्याय…

आपला कष्टाचा पैसा कुणी उगीचच दुसऱ्याला देत नाही. का द्यावा…? हेही खरेच… पण हा कष्टाचा पैसा आयकराच्या रुपाने सरकारकडे जात असतो. हा आयकर सरकार जनतेच्या भल्यासाठीच वापरत असले तरी आपण काही नैतिक मार्ग अवलंबून हा आयकर टाळू शकतो. कारण सरकारनेच आयकरदात्यांसाठी बऱ्याच सोयी सुविधा देऊन ठेवल्या आहेत. योग्य ठिकाणी गुंतवणूक केल्यावर आयकरात काही प्रमाणात सूट मिळू शकते. ही गुंतवणूक आपल्या भल्याचीही असते. मार्च महिना आला की आयकर वाचविण्यासाठी चाकरमान्यांची धावपळ सुरू होते. आपली ती होऊ नये यासाठी नेमकी कोणती गुंतवणूक योग्य आणि ती कधी करायची ते पाहूया.

शेअर बाजारात गुंतवणूक करणं तसं जोखिमीचंच… पण फायदे तेच मात्र जोखीम कमी असं हवं असेल तर म्युच्युअल फंडात गुंतवणूक करता येईल. त्यातही अल्प मुदतीच्या योजनांपेक्षा दीर्घ मुदतीच्या योजनांमध्ये तुलनेने जास्त आणि निश्चित असा फायदा मिळू शकतो हे लक्षात ठेवायचे. यासाठीच सिस्टिमॅटिक इन्वेस्टमेंट प्लान (एसआयपी) खूप महत्त्वाची ठरते. कारण यात नियमित केलेली गुंतवणूक हळूहळू मोठे रूप धारण करते. एसआयपीमध्ये दरमहा 500 रुपयांपासून गुंतवणूक करता येते. गुंतवणूक नियमित असो किंवा एकरकमी… ती एकाच कंपनीत किंवा योजनेत करण्यापेक्षा वेगवेगळ्या ठिकाणी केलेली कधीही चांगली असते. कारण शेअर बाजारात कायम तेजी राहणार नाही. त्यामुळे मंदीच्या काळात पैशाची गरज लागली तर नुकसान ठरलेले… त्यासाठी आपली गुंतवणूक विभागून ठेवलेली असली, तर कुठल्या तरी योजनेत फायदा होऊ शकतो.

एकरकमी गुंतवणूक

ज्यांच्याकडे एखादी मोठी रक्कम असेल ते एकरकमी गुंतवणूक करू शकतात. पण ही रक्कम दीर्घ मुदतीसाठी गुंतवावी. ही रक्कम आपल्याला लगेच लागणार नसेल तरच त्याचा फायदा किमान पुढील 5 वर्षांमध्ये होऊ शकतो हे लक्षात ठेवायचे. चांगला व अपेक्षित फायदा होईल म्हणून जास्त मोहाला बळी न पडता ही रक्कम 15 ते 20 वर्ष गुंतवून ती विसरुन जाता आले पाहिजे. एकरकमी गुंतवणूक वेगवेगळ्या योजनांमध्ये करता येईल. त्यात मासिक उत्पन्न योजना योग्य ठरेल. या योजनेत गुंतवणूकदाराला गुंतवणूकीचे तीन पर्याय असतात – वृध्दी पर्याय, डिव्हीडंड पेआऊट पर्याय आणि कॅपिटल ऍप्रीशिएशन सिस्टीमॅटीक ट्रान्सफर प्लान… यापैकी योग्य तो पर्याय निवडून गुंतवणूक करता येईल.

काय काळजी घ्याल?

  • आपला पैसा जेथे जाणार आहे,त्याची पूर्ण माहिती करून घ्या.
  • गुंतवणुकीचा सल्ला देणाऱ्या व्यक्तीची पार्श्वभूमी जाणून घ्या. तो किती खरा आहे ते तुम्हाला माहीत असले पाहिजे.
  • गुंतवणूक करणे हे तुमचे फायद्याचे आहे की ते विकावयास आलेल्या व्यक्तीच्या फायद्याचे आहे म्हणून तो तुम्हाला सुचवत आहे हे पडताळून पहा. तो फक्त काही चांगल्या बाजूंचीच माहिती देत असेल व त्यातील जोखमीची पूर्ण माहिती देत नसेल तर वेळीच सावधान व्हा.
  • बाजारात येणाऱ्या नवीन योजनेच्या मोहात पडू नका. यात तुमचेच नुकसान होईल.
  • जीवन वीमा हे बचतीचे वा गुंतवणुकीचे साधन होऊ शकत नाही. गुंतवणुकीसाठी बाजारात अनेक पर्याय आहेत. त्यांची माहिती करून घेऊन मगच त्या योजनांमध्ये गुंतवणूक करावी.
  • विमा प्रतिनिधी तुम्हाला भेटतो तेव्हा त्याला टर्म इंशुरन्सबद्दल माहिती देण्यास सांगा. यात तो टाळाटाळ करू लागला तर, एक तर त्याचे ज्ञान तोकडे आहे किंवा त्यात त्याचे कमिशन कमी आहे हे पक्के लक्षात घ्या.
  • शेअर बाजाराचे त्रोटक ज्ञान किंवा दुस-याने दिलेल्या टिपस् आधारे शेअर बाजारात ट्रेडिंग करुन नुकसान होण्याचीच शक्यता अधिक असतेब त्यापेंक्षा म्युच्युअल फंडात दीर्घ मुदतीसाठी पण नियमितपणे थोडी-थोडी गुंतवणूक केल्यास चांगला नफा होऊ शकतो.

साधारणपणे लोक आपल्या पगारातील काही रक्कम गुंतवणूक करतात. पण ही गुंतवणूक पगाराच्या 35 टक्के असायला हवी. पण एकदा खर्च पूर्ण झाले की ही गुंतवणूक वाढवून 40 टक्के एवढी तरी करावी.

  • कलम 80 सी अंतर्गत, ईएलएसएस म्युच्युअल फंड 1,50,000 रुपयांपर्यंत कर सवलत देतात.
  • ईएलएसएस रिटर्न इतरांनी ऑफर केलेल्या रिटर्नपेक्षा बरेच जास्त आहे कर बचत गुंतवणूक पर्याय
  • करबचत म्युच्युअल फंड किंवा ईएलएसएसमध्ये 3 वर्षांचा सर्वात कमी लॉक-इन कालावधी असतो, जो इतर करबचत गुंतवणुकीपेक्षा तुलनेने कमी आहे.

कुठे गुंतवाल?

गुंतवणूक म्हटली की नॅशनल सेव्हींग सर्टिफिकेट (एनएससी), सिनियर सिटीझन सेव्हींग स्कीम, बँक किंवा पोस्टातील 5 वर्षीय हेच आठवते, यात सवलत मिळत असली तरी यातून मिळणारे उत्पन्न हे करप्राप्त असते. म्हणून जरा सावधान. कर हंगामाच्या दृष्टिकोनातून एसआयपी हा फंड बचत म्युच्युअल फंडमध्ये (ईएलएसएस) गुंतवणुकीचा एक उत्कृष्ट मार्ग आहे ज्यामुळे आपले गुंतवणूक अनुशासित आणि संतुलित ठेवते. ईएलएसएस फंडातील एकूण गुंतवणुकीपैकी केवळ 15 टक्के भाग एसआयपीमार्फत घेतात आणि उर्वरित 85 टक्के एकरकमी घेतला जातो. म्हणून सल्लागार मंडळी गुंतवणूकदारांना एसआयपी करबचत बचत म्युच्युअल फंडामध्ये गुंतवणूक करण्याचा सल्ला देतात.

म्युचअल फंडाचे फायदे

  • गुंतवणूक करताना कोणतीही विशेष रक्कम आकारली जात नाही.
  • म्युच्युअल फंडामध्ये तज्ञांचे मार्गदर्शन मिळू शकते.
  • या प्रकारच्या फंडात जोखीम तुलनेने कमी असते.
  • आवश्यक तेव्हा केव्हाही पैसे काढून घेण्याची सुविधा मिळते.
  • आपल्या गुंतवणुकीचे रोजचे रोज मूल्य समजते.
  • कमीत कमी खर्च असतो. शिवाय यात पारदर्शकता असते.
  • म्युच्युअल फंडातून येणारे परतावे आयकरमुक्त असतात.
  • या प्रकारच्या फंडांवर सेबी व अँफीचे पूर्ण नियंत्रण असते.
  • आयकर कलम 80-सी खाली म्युच्युअल फंडांना वजावट मिळते.

आपली प्रतिक्रिया द्या